4 x 8 (BD) para o 8 de marzo (2)

Que vos pareceron as oito primeiras? Aventureiras, superheroínas e detectives..., apetecen ou non? Aí van as oito seguintes: diversidade, variedade e, claro, calidade.

9. Las extraordinarias aventuras de Adèle Blanc-Sec. 1 / Tardi

Non o imos dicir mellor que Joaquín Torán  en Fabulantes: “Cuando Tardi se decide al fin a tomar partido por ella (porque inicialmente iba para villana /.../), enamorado de sus trazos y de sus formas hoscas, no sólo le da una ocupación de mujer progresista y emancipada -escritora de libelos que se leen en los bajos fondos- sino que la dota de una volcánica personalidad, de un atrevimiento que roza el escándalo. La convierte en símbolo subversivo-destructivo de esa imagen de simple mujer-objeto, previsible, cándida, desamparada, encarnada en Bècassine, la primera protagonista de la historia del cómic.” A quen non seducirá Adèle despois de cativar o seu propio creador?

10. Franka / Henk Kuijpers

Franka mereceu, en xaneiro de 2011, a consideración de "a maior heroína de BD dos Países Baixos". A esta aventureira e detective, tamén lle corresponde o título de ser a primeira en “falar” galego, grazas aos cinco tomos que Xerais publicou en 1990. (Vaia unha subelada de saudade por aquela marabillosa iniciativa... e un pouso, un chisco, amargo: aqueles selectos títulos funcionarían mellor hoxe?)

11. Give me liberty: un sueño americano / Frank Miller, Dave Gibbons & Robin Smith

Martha Washington, nacida negra e pobre, é a protagonista desta descarnada sátira política de anticipación. Poderíase ler hoxe como unha especie de profecía cumprida?

12. Hexed: a marca de Lucifer / Michael Alan Nelson & Emma Ríos.

Luci Jenifer Inacio das Neves, Lucifer por mal nome, ladroa de obxectos máxicos, ten que enfrontarse a escuros e terribles poderes. Con ela comezou Emma Ríos a súa conquista de gringolandia. A súa primeira publicación en galego (antes da d’El Patito) foi por capítulos na inesquecible Galimatías.

13. Hulka: ley y desorden / Charles Soule & Javier Pulido.

Canto non se fala das dificultades de conciliación casa/traballo? Pois imaxinádevos a Hulka: ela ten que conciliar a súa condición de superheroína co seu traballo como avogada; de avogada pola súa conta xa que foi despedida do importante bufete no que traballaba (cal sería a razón?). Quen non estea ao tanto da evolución do xénero e diso que se chama “nova onda Marvel”, pode ter unha aterraxe moi agradábel con Hulka.

14. Hypocrite: como descodificar el atircopih / Jean-Claude Forest

Sintetízao ben (aquí) Francisco J. Ortiz: "... esta especie de Fantomas femenino creado por Forest está visto desde un prisma surrealista y sicodélico. Y es que Hypocrite /.../es un delirio pop repleto de personajes extravagantes, giros insospechados, situaciones absurdas y una clara voluntad por romper continuamente con la lógica del relato”. Hypocrite, gran novela histérica (sic), segue sendo rompedora e vangardista. A Marela cre que nunca o deixará de ser.

15. Isabellae / Raule & Gabor.

Cóntanos a Marela que se ela fose nova e puidese escoller, escollería ser Isabellae. Filla de samurai e irlandesa, as súas aventuras transitan entre esas dúas tradicións tan ricas e afastadas. Non falta ningún ingrediente do que debe ser un saboroso menú de aventura en estado puro. 

16. Jessica Jones : Alias / Brian Michael Bendis, Michael Gaydos & Bill Sienkiewicz.

Jessica Jones, antiga superheroína, leva Investigacións Alias, axencia de detectives especializada en superheroes.  JJ presentásenos “sen caer en prexuízos nin estereotipos, ofrecendo un perfil psicolóxico profundo e contundente, próximo e realista”. A obra encádrase máis na novela negra que non xénero “pixameiro”.

[Continuará...]
No próximo capítulo Julia e sete máis.