Día das Artes Galegas : LAXEIRO

 

Galería Montenegro

 

"Laxeiro é unha figura central da cultura galega do século XX pola súa achega á renovación e vangarda nas artes. O seu impacto no mundo da creación artística, 25 anos despois do seu falecemento, segue a ser incuestionable, tanto dentro como fóra das nosas fronteiras. Pero a pegada de Laxeiro non só se circunscribe a este ámbito. O artista lalinense conseguiu a aprobación popular dos galegos máis alá do ámbito pictórico e académico."

https://www.cultura.gal/gl/laxeiro

 

A celebración é un "motivo neste caso para afondar e difundir a figura de Laxeiro, decisiva para o desenvolvemento e difusión da arte galega no século XX, cuxa obra moderna e renovadora estivo sempre presente comprometida coa realidade do contexto sociocultural do seu tempo"

https://laxeiro.org/

E nesta liña de difundir a arte galega e a figura de Laxeiro, o noso alumnado do Bacharelato de Artes gozará, no Día das Artes Galegas, da obra de Laxeiro no Museo de Pontevedra, acompañados da profesora María Armada.

Literiatura [177] : Nahid Maghsoudi

Non queimamos libros, apagamos armas

de Nahid Maghsoudi

Ao fío de... Integra 2022

Luísa Areán Taboada, profesora de FOL, exerceu de reporteira da Marela no concurso Integra 2022, achegándonos unha clara descrición do mesmo:

"Comezou a xornada, ás 9:30 horas, cos participantes repletos de emoción, á expectativa e con ganas de coñecer, xa, as misións ás que terían que enfrontarse ao longo das tres horas que duraría a proba. Armados cos coñecementos adquiridos e coa tensión precisa para xerar concentración e bos resultados, alí estaban os oito equipos, formados por alumnado de FP Básica 1, FP Básica 2, SMR 1, SMR2, ASIR1, DAW 1 e DAW 2, cada un na aula asignada e con todo o material necesario para poñerse ao traballo. Tres horas para organizarse da mellor maneira posible, aproveitando as fortalezas de cada integrante e para poder dar conta dos sete retos.

Nas miñas visitas ás distintas aulas puiden ver como o rebulicio dos primeiros intres se ía transformando en quietude e concentración: uns montando os equipos, outros preparando a infraestrutura da rede, algúns embebidos polas pantallas cheas de diminuto código... E sempre contando co apoio e vixilancia das profesoras e dos profesores de Informática que, cada un na súa especialidade, ían asesorando os equipos ata onde o permitía a competición.

O gañador foi o Equipo 7, cunha puntuación de 43.25 puntos, integrado por:

• Borja Valladares Hermida, de 2º de FPB
• Deyber Abraham Silva Alfaro, de 1º de SMR
• Cristian Mella Hermida, de 2º de SMR
• Natasha Núñez Salán, de 1º de DAW
• David Ibáñez Leal, de 1º de DAW
• Nicolás Rocha Rodríguez, de 1º de ASIR
• Francisco Lázara Fernández, de 2º de ASIR "

O alumnado tamén lle fixo chegar a Luísa Areán a súa opinión sobre o que máis lle gustara, manifestando que, ademais de traballar en equipo con compañeiros e compañeiras doutros ciclos, o feito de sentir como se ía creando máis unión nas aulas de traballo, compartindo entre eles e elas as distintas maneiras de resolver algún dos bloques da actividade, contribuíu a facer máis levadío o concurso.

Pero tamén foron críticos, demandando mellor organización e máis información previa ao concurso en si, así como tarefas que implicasen aínda máis cooperación dentro do equipo.

Sen dúbida, unha interesante actividade da que profesorado e alumnado sempre aprende algo máis. Parabéns para todas as profesoras e todos os profesores que deseñaron, organizaron e coordinaron a actividade. 

Equipo campión de Integra 2022

E no medio de tanto traballo e bo clima de cooperación, ben se merecían tomar as once.

 

Os segundos clasificados

Equipo clasificado en 3ª posición

27-M : Día Mundial do Teatro

Hoxe, 27, conmemoramos o Día Mundial do Teatro subscribindo de pleno “Somos”, Manifesto Galego do Día Mundial do Teatro asinado este ano por Fernando Dacosta e no que enxalza a profesión teatral como “facho que reporta sabedoría á sociedade”.

Cultura.gal

Desde A Marela, recomendamos pórlle ramo á celebración, coa asistencia á representación d’O porco de pé, adaptación de Producións Teatrais Excéntricas da novela homónima de Vicente Risco, que ten a Quico Cadaval como director e codramaturgo, xunto con Pepe Sendón; e que terá lugar o sábado 2 de abril no Salón Teatro de Lalín.

 

Coa nosa xente: Laura e Javier

Ao fío do concerto que as bandas infantil e xuvenil da Escola da Banda de Lalín van celebrar o vindeiro sábado 26 no Auditorio de Lalín, traemos hoxe á sección Coa nosa xente a Laura Fernández Puga e Javier Carballude Iturburua, directora e director respectivamente da Banda infantil e Banda xuvenil da Escola da Banda de Lalín. 

Moitos parabéns polo progreso persoal e o labor profesional que estades a desenvolver cos máis novos, formando a inesgotábel canteira de músicos de Deza. Un labor sobre o que Laura, en declaracións a Faro de Vigo, reflexiona, afirmando que “desde pequeno nótase que neno ten futuro musical”. Por parte, Javier, en declaracións a La Voz de Galicia, manifesta que "o interese pola música pode xurdir dun concerto didáctico".

 

Laura Fernández co cartel do concerto. Faro de Vigo. Bernabé / Javier Lalín

Javier Carballude co seu perfil de Facebook

 

A seguir a nosa Laura e o noso Javier no seu paso polo Bacharelato:

 

Laura. Curso 2014-2015. Copyright IES Aller Ulloa

Javier. Curso 2012-2013. Copyright IES Aller Ulloa

Concurso Integra

O Departamento de Informática organiza un ano máis o "Concurso Integra", e xa van catro edicións nas que, aplicando os principios do traballo cooperativo, cada equipo, formado por alumnos e alumnas dos distintos ciclos, deberá ser quen de superar os sete retos propostos.

Escollemos o xoves 24 de marzo para a celebración da proba xa que coincide co final da segunda avaliación, xusto antes de que este alumnado deixe o centro para incorporarse ás empresas nas que realizarán a súa FCT (Formación en Centros de Traballo).

Coordinación, liderado, compañeirismo, cohesión, solidariedade, intercambio de coñecementos e apoio mutuo serán necesarios para dar conta das sete misións encomendadas, nas que, dun xeito global, deberán aplicar as competencias adquiridas até o momento nos ciclos cursados por cada un deles.

Seguiremos de preto o desenvolvemento do concurso e achegaremos a esta bitácora as impresións dos participantes, así como os mellores momentos da competición.

Luísa Areán Taboada, profesora de FOL

Encontro con Bran Barral Buceta

O programa "A ponte entre o Ensino Medio e a USC" achega este xoves ao noso IES  da man de Bran Barral Buceta, Doutor en Ciencias Polítcas e sociólogo, para informar e orientar o alumnado de 4º da ESO, futuribles estudantes universitarios.

Após do Encontro con Horacio García e Marcos Valcárcel chega Bran Barral. Hai dúas semanas Xeografía e mañá Socioloxía. E aínda está por vir Juan Gestal e a información sobre as pandemias.

 

23-F. Día de Rosalía : O vídeo

Non sen tempo, vén de saír do forno o vídeo da conmemoración do Día de Rosalía que no seu momento acolleu nas aulas a presenza da propia Rosalía acompañada de Pondal e Curros. Recreación escénica alicerzada nunha idea orixinal de Carmen Frade que contou cuns actores e cunhas actrices de 4º da ESO de sete estalos.

O elenco de actrices e actores na Biblioteca con Carmen Frade, impulsora da idea

A seguir o vídeo:

 

 

Parabéns a todas e a todos.

E a biblioteca quedou pequena

Seica unha imaxe vale máis ca mil palabras: a nosa biblioteca coa súa capacidade completa. A covid obrigounos a permitir a entrada só de 27 usuarios, e hoxe a choiva e os exames fixeron que o espazo non chegase a nada. Os puntos verdes ocupáronse e ordenadores, apuntamentos en papel e libros encheron as nosas mesas.

"Unha imaxe ben bonita, merecedora dunha foto", dixo Mario, e mans á obra:

Ao fío do Encontro con Antón Iglesias

O artista lalinense Antón Iglesias Fernández reuniuse co alumnado do Bacharelato de Artes na aula taller do noso instituto. No decurso da charla os alumnos e as alumnas realizaron unha serie de apuntamentos sobre a relación do artista coa pintura ao longo dos seus máis de corenta anos de traballo.

Aquí vos deixamos algunhas das súas opinións e algúns dos seus debuxos, así como fotos do encontro.   

Francisco Otero, profesor do Dpto. de Artes Plásticas

"O que máis me gustou da charla foi o interese que transmitía ao contarnos a súa vida e a súa traxectoria artística." 

Alazne Solís, 1º Bac. B

"A charla foi moi interesante porque traballa empregando diferentes técnicas: colaxes (mesmo empregou nalgún momento os apuntamentos da súa filla), pinturas ao óleo e acrílico. Os seus debuxos evolucionaron co paso do tempo e participou en moitos concursos e exposicións."

Carmen Donsión, 1º Bac. B

"O que máis me gustou foi que trouxo as obras que fixo e que as explicou moi ben." 

Paula Méndez, 1º Bac. B