Mahatma Ghandi dixo que non hai día para a Paz, senón que a Paz se celebra todos os días. Aínda así, na axenda dos centros educativos sinálase o 30 de xaneiro como a data para a súa celebración.
Coordinado por María Jesús Barcala, o alumnado de 4º da ESO deseñou un cartel que nos invita a reflexionar sobre que é a PAZ, "Cerra os ollos... Pensa na Paz. QUE VES?", pregunta. O alumnado de todo o centro xa está deixando as súas respostas, algunhas delas ben sorprendentes.
Cada 30 de xaneiro, coincidindo co día do nacemento de Castelao, celébrase o Día da ilustración, evento que se vén desenvolvendo a iniciativa da Consellaría de Cultura, Educación e Universidade en colaboración coa Asociación Galega de Profesionais da Ilustración (AGPI).
Neste 2024, o Día da Ilustración está dedicado á figura de Xesús “Chichi” Campos, que deixou fonda pegada como debuxante, humorista, columnista e guionista. A este respecto, desde A Marela recomendamos o documental Chichi Campos e mais eu, realizado polo seu fillo Nico Campos, e o vídeo-homenaxe Día da Ilustración 2024: Xesús (Chichi) Campos, produción da AGPI e da Dirección Xeral de Cultura da Xunta de Galicia.
E a fin de conmemorar tal Día da Ilustración o alumnado de 4º da ESO e de 2º do Bacharelato, partindo dunha idea orixinal da profesora Mª Carmen Frade Gómez e coordinado pola propia Carmen e a profesora Uxía Nogueira, en colaboración coa Biblioteca, desenvolveu como actividade complementar As nosas cousas, creación baseada no libro de relatos Cousas de Castelao, que deu como resultado a exposición das diferentes propostas das e dos 145 alumnas e alumnos que conforman os dous cursos, que se poderá ver desde o 29 de xaneiro, na entrada do IES; así como a edición dixital e en papel dunha antoloxía dos diferentes relatos ilustrados.
A seguir fotos da exposición:
E non podía faltar o libro dixital como ramo ao Día Ilustración:
Volven as Olimpíadas á Biblioteca Mario Pereira: premios en metálico, coroas de loureiro e até unha viaxe. Forma o teu equipo e pide na Biblioteca a folla de inscrición.
Non te demores, empezamos o luns 29 de xaneiro.
Baixo a coordinación da profesora Alba Payo, o alumnado de Xeografía e Historia de 1º da ESO participou nun obradoiro de escritura cuneiforme, propia da civilización mesopotámica.
Tal e como fixeron os sumerios hai máis de 5.000 anos, as nosas rapazas e os nosos rapaces traballaron as táboas de arxila fresca cun punzón, ou estilete, que ao ser apretado contra o material brando ía deixando marcas en forma de cuña, elaborando así os seus propios pictogramas.
O resultado final deu lugar a unha exposición que se poderá contemplar no vestíbulo do IES Ramón Mª Aller Ulloa desde este martes 9 de xaneiro ata o vindeiro 23. Como adianto, imaxes dalgúns deses textos.
