26 xuño, 2022

A Biblioteca en obras

Nada é permanente agás o cambio”, titulaba a Marela aló por xuño de 2007, cando a Biblioteca principiara as obras que lle darían o aspecto actual; e agora en xuño de 2022, a Biblioteca mergúllase de novo en obras coa finalidade de lle anovar tal aspecto. Unha remuda que agardamos sexa lucida e da que, xaora, informaremos. 
De feito, estes últimos días andan os libros algo nerviosos, sabedores de que terán que se pór a bo acubillo, antes de que comece a desfeita produtiva.



22 xuño, 2022

Ao fío de... Encontro con Horacio García

O traballo de HORACIO GARCÍA Promoting fluvial geomorphology to "live with rivers" in the Anthropocen Era, vén de ser recoñecido como o mellor artigo de Xeografía en revistas estranxeiras, acadando, deste xeito, o VIII Premio "Roser Majoral Moliné" da Asociación Española de Xeografía.

Tal e como nos explican en  GCiencia, o traballo do profesor da USC, no ámbito da  xeomorfoloxía fluvial, céntrase na mellora da ecoloxía fluvial e o deseño de políticas de restauración dos caudais fluviais.

Desde A Marela queremos facerlle chegar os nosos parabéns a Horacio, co que puidemos conversar o pasado 7 de marzo (ver enlace).

Imaxe: El Progreso
                                                                                                                 

21 xuño, 2022

O Bibliotecario

Hoxe, 21 de xuño, tivo lugar no vestíbulo do instituto a estrea mundial da curta de animación O Bibliotecario.

A realización da curta O Bibliotecario comezou a súa andaina durante o curso 2019-2020, a partir dunha idea orixinal de Brais Carballude Recimil, alumno do Bacharelato de Artes do antedito curso 2019-2020, co obxectivo do fomentar o uso da Biblioteca entre o alumnado, mais por mor da pandemia demorouse a finalización do proxecto ata este curso 2021-2022. 
Para o deseño da curta utilizouse a técnica de debuxo sobre papel e animación dixital 2D, cunha duración de 1:42 minutos.
 
   
 
A realización correu a cargo do Departamento de Debuxo do IES “Ramón M.ª Aller Ulloa” so a coordinación do profesor Francisco Otero, contando coa colaboración da profesora María Armada e co apoio da Biblioteca. 
Con: 
Francisco Otero na adaptación e o guión técnico. 
Matías López Rodríguez no deseño do personaxe Payo, o Bibliotecario, e Patricia González Meire no deseño das personaxes Nenas. 
Carmen Donsión Rodríguez, Elías López Leite, Sara López Rodríguez, Paula Méndez Vilas, Malena Mato Melgarejo e Alazne Solís Vilaverde; no deseño de decorado e na sincronización e animación de diálogos. 
Nos diálogos: 
Payo, o Bibliotecario: Xosé Payo Cangado 
Nena da dereita: Carmen Donsión Rodríguez
Nena da esquerda: Sara López Rodríguez. 
No son, o Banco de sons do INTEF. 
Na música, Moncho Faílde Delgado.
Desde a Marela parabéns a todas e a todos pola profesionalidade demostrada.

15 xuño, 2022

Mochilas viaxeiras

Desde Bibliotecas escolares de Galicia puxéronse en marcha, xa van alá uns cantos cursos, as MOCHILAS VIAXEIRAS, unha bolsa (mochila, maleta...) que permite levar ás casas o material que atesouran as nosas bibliotecas. A idea é que sexa toda a familia a que poida gozar dos libros, revistas, álbums ou cine que temos no instituto. 

Mais nalgúns centros levamos anos dándolle voltas e deixamos que sexa cada usuario o que elabore a súa propia mochila. O profesorado asesora, recomenda, ensina novidades... Pero é a persoa lectora a que finalmente escolle o lote de material que leva para os seus, e para si mesma. O único compromiso é devolver, en setembro, o material que agora leva en préstamo. 

"A mochila é o soporte que permitirá aos rapaces e ás rapazas levar á súa casa, en préstamo temporal, uns materiais que reforcen o vínculo entre familia e escola no seu labor común para a formación dos lectores máis novos", din desde a Asesoría de Bibliotecas escolares de Galicia, e nós así o esperamos.



14 xuño, 2022

14 de xuño: Aniversario de Ana Frank

12 de xuño de 1942

Espero confiarcho todo como non puiden facer con ninguén, e que sexas un grande apoio para min.

Domingo, 14 de xuño de 1942

O mellor será que empece desde o momento en que te recibín, cando te vin na mesa dos regalos de aniversario (tamén presenciei o momento da compra, pero iso non conta).

Diario de Ana Frank



08 xuño, 2022

8 de xuño. Día mundial dos océanos

Non debían ir moi ben as cousas para os océanos cando xa no ano 1992, no Cumio da Terra (Río de Janeiro) decidiron dedicarlle un día ao ano. Desde aquela, cada 8 de xuño, celebramos o DÍA MUNDIAL DOS OCÉANOS. O lema para este ano, "Revitalización: acción colectiva polo océano" fai fincapé na necesidade de que sexamos todos os que coidemos das nosas augas.

O 50% do osíxeno do planeta é producido polo océano, que cobre o 70% da superficie da Terra. Banco de recursos fundamental para a nosa alimentación, tamén proporciona traballo directo, ou indirecto, a máis de 1.000 millóns de persoas. Pero, segundo nos advirten desde as Nacións Unidas, ata un 90% das grandes especies mariñas están xa en mingua, polo que os recursos e os postos de traballo que nos ofrecía corren serio risco de desaparecer. 

Acheguemos, pois, o que poidamos, e coidemos dos nosos mares.

Imaxe e información tirada de https://www.un.org/es/observances/oceans-day

07 xuño, 2022

Ledicia Costas, Premio Lazarillo por 3º vez

Escarlatina, a cociñeira defunta, no ano 2015,  A balada dos unicornios, no 2017 e A lebre mecánica no 2021 converteron a Ledicia Costas na primeira autora en conseguir ata en tres ocasións o Premio Lazarillo de literatura infantil, galardón que selecciona as obras entre as escritas nas catro linguas oficiais do estado español, o que lle proporciona un valor engadido.

Os membros do xurado destacaron que é unha obra "cun bo nivel de linguaxe para os adolescentes" e que trata temas como a diversidade de xénero e a ludopadía. Asemade, combina "de maneira equilibrada" a narración e os diálogos con "reflexións contrastadas e conformes ás vivencias da idade".

Se queredes comprobar por vós mesmos como é a escrita de LEDICIA COSTAS podedes pasar pola nosa biblioteca e levar algunha das súas obras. E se sodes usuarios de bibliotecas escolares tamén podedes ler catro das súas obras na plataforma E-elbe 2.

Así mesmo, deixámosvos o enlace á nosa última guía de lectura, sobre Golpes de luz.



03 xuño, 2022

3 de xuño de 1876, nace Ramón Cabanillas

Cabanillas, o POETA DA RAZA, o da loita AGRARISTA naceu en Cambados, pero coma moitos homes galegos do seu tempo tamén coñeceu a emigración, e tamén se desilusionou; pero el puido volver e retomar á súa vida en Galicia.

A través da súa obra pretendía educar o pobo, achegalo ao nacionalismo e a esa loita pola defensa da propiedade das terras que traballaba. Fixo, así, unha poesía social que non lle impediu achegarse tamén ao intimismo, mesmo ao costumismo decimonónico, iso si, influenciado xa polo Modernismo. 

Non é fácil escoller un único texto do autor para recordalo no 126 aniversario da súa morte, pero nós quixemos deixarvos un aquí.  A biblioteca Mario Pereira ofrécenos a súa obra completa en libro analóxico (o de papel, de toda a vida) e a Biblioteca Virtual Galega dános a posibilidade de ler, en formato dixital, boa parte dela.


"A taberna"

Os mozos mariñeiros da fiada

lémbranse rindo alleos de coidados;

cheira a aceite e pemento requeimados

rustrido de xurés en caldeirada.

 

Conta o patrón nun corro a treboada

do ano setenta –historia de afogados–;

e empuxándose, inando, entran mollados

os homes dunha "lancha de enviada".

 

Pasa de man en man a xerra roiba

de albariño, e namentres cae a choiva

o vento fai tremar a casa enteira,

 

detrás do mostrador clarexa o ceo

nas trenzas de ouro, no mirar sereo,

na sorrisa de luz da taberneira.

      No desterro (1913)


                               Imaxe: portada do libro Ramón Cabanillas, Cambados e o mar de Arousa, de Francisco Fernández Rei

01 xuño, 2022

Cen días de guerra

A guerra en Ucraína chegará este venres, se nada o remedia, aos cen días, un conflito no que todos perdemos, coma sempre. Unha disputa que deixa vítimas de todo tipo: militares, civís, xornalistas... Coma calquera guerra, como en calquera momento, coma en calquera lugar. 

Nós só podemos dicir NON ÁS GUERRAS, agora e sempre. Na entrada do instituto podedes ver unha pequena selección de obras literarias de denuncia da belicosidade. Aquí, da man de Celso Emilio Ferreiro, deixámosvos un dos poemas máis coñecidos da nosa literatura, un texto no que o onde, o cando, o como, o porqué... son o de menos. Un poema no que se denuncia a barbarie bélica e do que parece que non aprendemos.





30 maio, 2022

Doenzas, en inglés

EXPOSICIÓN SOBRE DOENZAS MENTAIS E FÍSICAS NO IES ALLER ULLOA

Manuel Lombana, subdelegado do grupo, infórmanos sobre o que estiveron a facer estes últimos días nas aulas de Lingua Estranxeira Inglés:

Os alumnos e as alumnas de 1º de FPB do Instituto Ramón María Aller Ulloa, neste curso 2021/2022, na materia de Inglés, coordinados pola nosa profesora Saleta Fragueiro, fixemos diversos traballos para falar das enfermidades tanto mentais (depresión, ansiedade, alzheimer, problemas de alimentación e esquizofrenia), como físicas (cancro de pulmón e cancro de colon).

O noso traballo consta dunha serie de pósters elaborados usando as novas tecnoloxías así como material escolar, por exemplo cartolinas. Todos eles inclúen os síntomas dunha das enfermidades mencionadas, consellos para o doente así como unha dieta óptima a seguir.

O noso obxectivo é informar a todo o alumnado e profesorado do instituto sobre estas enfermidades e darlles visibilidade no contexto educativo.


Todo o alumnado de FPB1 obtivo un resultado positivo á hora de traballar nun tema que nos gusta e nos afecta directamente, a pesar de estar feito nunha lingua estranxeira. Aquí deixamos algunhas das nosas opinións:

“Gustoume moito facer este traballo porque aprendín sobre a enfermidade. Ademais axudoume a practicar o inglés. Sentinme moi a gusto traballando neste proxecto.” (Ángela)

“Facendo este traballo, sentinme moi ben, estaba a gusto eu soa. Aprendín cousas novas sobre as enfermidades. Axudoume moito para mellorar o inglés. Sobre a miña enfermidade aprendín cousas das que non tiña nin idea, pero rematei cun moi bo resultado.” (Anabel)

“Con este traballo sentinme moi ben cos meus compañeiros. Á parte diso, aprendín palabras novas que me poden servir para o futuro. Obtiven información a través da miña compañeira, que ten experiencias persoais, e algunha outra da internet.” (Andrea)

“Para nós foi unha experiencia única xa que puidemos saber máis sobre unha enfermidade que é moi coñecida e da que tiñamos moi pouca constancia sobre o que leva consigo vivir,  ou tratar cunha persoa que a padece.” (Uxía e Vanesa)

“Ao elaborar este traballo sentinme ben e aprendín a separar o persoal do laboral. Aprendín máis inglés do que sabía. Para a elaboración dos pósters, saquei a información, en gran parte, das miñas experiencias persoais e algunha da internet.” (Paula)








25 maio, 2022

Ao fío de... Concerto de AldaoLado

Xa temos as imaxes do concerto que as poetas Lucía Aldao e María Lado ofreceron ao noso alumnado. E como consecuencia da lectura da súa obra,  LAURA VÁZQUEZ, de 3º ESO, tamén se animou a escribir. Aquí vos deixamos as imaxes do concerto e o texto de Laura.

Tratando de encaixar todas esas pezas, que ti cubrías nun quebracabezas, mentres me quitaban a vendaxe que suxeitabas con delicadeza, fun caendo nunha profunda tristeza.

Cada vez que me dirixía ao penedo sen paracaídas, ti mirábasme con ese sorriso frío que cubría ese baleiro que te posuía por dentro.

Caricias, bicos, apertas, pero nunca palabras que me axudasen a saír desa escuridade que me consumía, aqueles paseos nos que sempre acababamos no mesmo sitio, actos que nunca vin, que rexeitaban a alegría que me consumía, sen darme conta do dano que me facías, aquelas bágoas que nunca vin e que crin; caín e a túa man desapareceu.

Estaba perdida, ignorei os meus guías, perdinme. Ao mesmo tempo que corría os quilómetros en balde que me causaban unha fonda pena, non me atopaba; berraba, non sabía onde estaba, buscándome naquel lugar ardendo, moitas mans axudándome que eu ignoraba.

Cambiáchesme, só me perdín nesa sombra na que percibía un cariño inexistente, coma o fume dun cigarro que non se acende.

Os meus pensamentos non se entendían cos meus sentimentos cos que te divertías. A venda dos ollos que me recibiu foi desaparecendo aos poucos, como a túa tentativa de vítima que fixeches cando marchei.

Delicadamente marchei con certeza pola viveza que vai ser engulida por ese tempo perdido.

Laura Vázquez


24 maio, 2022

Obradoiro de primeiros auxilios

O luns 16, o alumnado dos Ciclos Formativos participou no OBRADOIRO DE PRIMEIROS AUXILIOS impartido por Pepe Palacios Aguilar, profesor de Educación Física e Deporte na Universidade de A Coruña. 

A actividade centrouse na actuación que debemos ter ante unha parada cardiorrespiratoria. O obxectivo era concienciarnos sobre a importancia dunha pronta e eficaz intervención: no caso de parada só dispomos de cinco minutos de reversibilidade, polo que o papel da primeira persoa que interveña marcará a diferenza entre un final fatal ou unha posible reanimación.

"O 60% das mortes súbitas de orixe cardíaco ocorren no domicilio ou no lugar de traballo. A evidencia científica avala a importancia da activación precoz da cadea de supervivencia para tentar reverter a parada cardíaca e o comezo inmediato da RCP básica e o uso precoz do desfibrilador", comentábanos Pepe Palacios.

Todos os participantes, tanto profesorado como alumnado, puidemos realizar as prácticas sobre un control rápido de danos e sobre como actuar segundo as distintas situacións coas que nos podemos atopar. A seguir, aprendemos a usar un desfibrilador.

Luísa Areán Taboada, profesora de FOL








23 maio, 2022

Talleres musicais: ecopercusión e novas tecnoloxías

 Maio tróuxonos o bo tempo, e Ecopercussión  puxo o ritmo. 

O Departamento de Música organizou un par de obradoiros simultáneos para todo o alumnado de 2º e 3º da ESO. Uns caldeiros vellos de pintura e tres ou catro bidóns reutilizados convertéronse en instrumentos de percusión. 







21 maio, 2022

AldaoLado en concerto

Que mellor maneira de rematar a SEMANA DAS LETRAS GALEGAS que cun recital de AldaoLado. María Lado e Lucía Aldao viñeron a Lalín, invitadas polo ENLG, o Dpto. de Galego e a Biblioteca para que os nosos mociños e as nosas mociñas que leran Ninguén morreu de ler poesía as puidesen ver e escoitar en directo. O aforo derivado do protocolo Covid fixo que o salón de actos do instituto quedase pequeno e pedimos prestado o Salón Teatro por unhas horas.
O alumnado de 3º de ESO, FP Básica e 1º do Bacharelato puido gozar do espectáculo poético musical que estas dúas poetas ofrecen, facendo un repaso tamén da dialectoloxía do noso país e algunhas cuestións gramaticias como a colocación do pronome átono, sempre con humor e ironía.

Á espera da crónica que está a preparar o alumnado, e das imaxes que nos acheguen, deixámosvos o cartel anunciador da actividade.





19 maio, 2022

Ana Novo Cuñarro e Andrea Segade Rozas : IX Concurso literario Mª Vitoria Taboada

Onte, mércores,  Ana Novo Cuñarro e Andrea Segade Rozas recibiron os primeiros premios de narrativa e poesía, respectivamente, do IX Concurso literario Mª Vitoria Taboada.  Fíxolles entrega dos galardóns Alba Loureiro, profesora de Lingua e Literatura galega do noso IES.

A entrega de premios estivo, unha vez máis, condicionada pola pandemia. Agardamos o próximo curso poder celebrar o acto co cerimonial que se merece.

PARABÉNS para as nosas escritoras.






17 maio, 2022

As cartas da esperanza : O libro


O pasado mes de marzo, o vestíbulo do instituto foi testemuña da exposición A Gran Guerra : As cartas da esperanza, actividade desenvolvida polo alumnado de 4º da ESO coordinado pola profesora Alba Payo. Da mesma xa demos conta no seu momento na Marela.

Xaora, faltaba o libro, que por cuestións técnicas se fixo de rogar, pero vén de saír do forno. A coincidencia co 17 de maio lévanos ende ben ou ende mal a reflexionar sobre o paralelismo entre as Cartas da esperanza e este noso Día da esperanza.

Agardamos que á hora de lelo experimentedes as mesmas sensacións que o alumnado, que, en palabras da profesora Alba Payo, se puxo na pel destes soldados e escribiu esas cartas nas que transmitiron os sentimentos na fronte de batalla, o medo, a saudade, a morriña, o compañeirismo, o odio, a desilusión, a perda de esperanza… E que a alumna Cora Pereira Seda soubo recoller de xeito maxistral na ilustración da portada do libro.