01 decembro, 2022

Xa somos Radio na Biblio!

 Tal e como publica a páxina de Bibliotecas escolares de Galicia, desde onte mesmo, de maneira oficial, pasamos a formar parte do grupo de centros educativos que contan con Radio na Biblio. Desde principio de curso, a profesora María Jesús Barcala está gravando podcasts co seu alumnado, pero agora poderán dispor de asesoramento, a través de obradoiros, e do material específico para traballar con máis comodidade.

Tamén hoxe a prensa local se fai eco da noticia, tal e como podemos ler nas páxinas de Faro de Vigo, na súa edición local.



26 novembro, 2022

Ao fío de... 25 N

Pasou o día... e esperamos que as actividades levadas a cabo polo alumnado de 4º da ESO A e C e 1º do Bacharelato servisen para concienciar da necesidade de acabar coa lacra do maltrato contra as mulleres.

O primeiro en mostrar o seu traballo foi o grupo de 1ºC, coordinado pola profesora de Lingua e Literatura galegas, Uxía Nogueira. Unhas cartolinas recollían o nome das mulleres asasinadas neste 2023 e un dato sobre a súa morte que, a cada un deles e cada unha delas, lles pareceu estarrecedor. Lían en voz alta o nome da muller e colocaban a cartolina sobre unha cadeira baleira, simbolizando deste xeito esas 40 vidas arrebatadas no que levamos de ano.

A continuación, o grupo de 4º da ESO C, coordinado pola profesora de Xeografía e Historia, Alba Payo, leu unha selección de textos narrativos e poéticos nos que se denuncia a violencia machista exercida contra as mulleres. Podedes ver a escolma neste enlace.

Finalmente, as rapazas de 4º da ESO A, guiadas pola profesora de Inglés, Saleta Fragueiro, leron as cartas que elas mesmas escribiran, dirixidas a persoas, ficticias ou non, do seu contorno: nais, irmás, amigas... posibles vítimas desta lacra social. Algunha das misivas fixo que os ollos do público se embazasen de emoción, dor e rabia.

Aos que nos ledes, aínda que non puiderades estar alí, só vos queremos dicir o mesmo que Saleta lle pediu ao noso alumnado: "Rapazas: querédevos moito, respectádevos e facédevos querer e respectar. Rapaces: confiamos en vós"

Deixámosvos aquí algunhas das fotografías que a profesora do Dpto. de Artes, Mari Ruzo, nos fixo chegar. Os lazos son traballo do voluntariado da Biblioteca e da profesora de Bioloxía Ana Penas, e do son encargouse o profesor de Inglés Manuel Conde.
















25 novembro, 2022

25 N : Día Internacional da Eliminación da Violencia contra a Muller

Un ano máis, como cada 25 de novembro, celebramos o Día Internacional da Eliminación da Violencia contra a Muller, sempre coa esperanza de que sexa o derradeiro. E facémolo lembrando as vítimas da violencia de xénero, mulleres anónimas, que polo feito de seren mulleres sufriron a terríbel lacra da violencia machista. 

A Biblioteca faise eco das diferentes actividades a desenvolver para conmemorar o 25N:

Cadeiras baleiras, por 1º Bach C
Cartas contra a violencia, por 4º C 
Voces poéticas e narrativas contra o maltrato, por 4º A

A maiores, desde A Marela, propoñémosvos contra a violencia de xénero dúas suxestións:  A breve escolma poética e narrativa, Voces contra a violencia de xénero

A curta de animación Teatro de la injusticia realizada polo Instituto Navarro para a Igualdade e o Concello de Ansoáin.

 

19 novembro, 2022

20 anos da desfeita do Prestige

 Que razón tiña Gardel cando cantaba aquilo de "que vinte anos non é nada"...  Pasaron xa 20 anos desde que o PRESTIGE, un buque monocasco (seica ese foi un dos problemas), afundiu fronte ás nosas costas, á altura de Vigo, a unhas 138 millas mar adentro provocando a maior das mareas negras da nosa historia.

  Esa marea de chapapote deu lugar a outra marea humana, a do NUNCA MÁIS, pero 20 anos despois os grandes petroleiros seguen pasándonos por diante dos narices, 36.000 barcos ao ano, e o 35% deles con cargas perigosas coma o petróleo, segundo sinala Greenpeace (El Correo Gallego 18/11/22).

    Tamén Gardel cantaba que o esquecemento todo o destrúe, e para que o noso alumnado, que xa non sabe que é iso do Prestige non esqueza o desastre, asistiu á representación de N.E.V.E.R.M.O.R.E, de Chévere Teatro, da que xa demos conta  no seu momento (Clicar aquí) e sacamos ao vestíbulo obras que versan sobre esta traxedia, algunhas xa cuns aniños coma Prestige. Crónica negra dun modelo enerxético insostible, do CEIDA; e outras de recente incorporación ao noso fondo como Tal como foi, tal como fomos, de Xosé Manuel Pereiro. Se queredes botarlle unha ollada non dubides en pedilos na Biblioteca.






11 novembro, 2022

Semana de teatro

Esta semana o noso alumnado asistiu a dous espectáculos teatrais da man do Grupo Chévere, no Auditorio de Galicia. 

O martes 8 os rapaces e as rapazas de 4º ESO coñeceron algúns momentos da nosa historia recente, e non tan recente, grazas a Curva España, unha peza que o propio grupo clasifica como teatro-documento e ficción teatral. Nela teatro e cine entrelázanse para desvelarnos algúns datos máis sobre o accidente do enxeñeiro España nunha curva de Verín nos días nos que se estaba decidindo o trazado das vías do ferrocarril por terras ourensás.

E este venres 11 foron as mozas e os mozos de 1º do Bacharelato os que puideron desfrutar de N.E.V.E.R.M.O.R.E, unha peza teatral que os levou ata aquel 2002 do Nunca Máis.

Deixámosvos algunhas imaxes, por cortesía de Severiano Casalderrey e Ana Camiño, do noso alumnado e dos actores:









06 novembro, 2022

Severiano Casalderrey e o volume 3 dos Cadernos FICBUEU

Unha vez máis, comprácenos presentar na Marela, unha nova publicación do noso compañeiro Severiano Casalderrey, desta volta o volume nº 3 dos Cadernos FICBUEU, so o título As prácticas do IIEC e da EOC como primordio dun novo cinema español (1947-76)

Seve en plena presentación
 

Xa no seu momento, na Marela, nos fixemos eco da publicación dos volumes 1 e 2 dos anteditos Cadernos: A "Nouvelle vague" a través das súas curtametraxes (1956-65)  e O National Film Board of Canadá e a súa “Idade dourada” da curtametraxe (1963-83).

No acto de presentación, desenvolvido este sábado no marco da Escola de Música de Silleda, Seve foi esmiuzando con precisión os diferentes capítulos do libro. 
A seguir unhas instantáneas do evento, xentileza da Escola de Música de Silleda:
 

 



05 novembro, 2022

Recepción de Gonzalo Navaza como académico de número

Gonzalo Navaza / academia.gal
 

Por fin, hoxe, 5 de novembro, ingresa como numerario da Real Academia Galega  o filólogo e escritor lalinense Gonzalo Navaza, ocupando a vacante do finado historiador Xosé Ramón Barreiro.   
O discurso de toma de posesión versará sobre Nomes de persoa na toponimia de Lalín. Acto que se poderá seguir a través da web da RAG, a partir das 12:30 horas.   
Gonzalo Navaza fora elixido académico polo pleno da RAG o 23 de outubro de 2021, mais é agora cando por fin a xustiza académica se fai realidade ao sentar de pleno dereito na cadeira de académico. 
Xa no seu momento a Marela se fixera eco da nova da elección.
Unha vez máis, moitos parabéns Gonzalo.

04 novembro, 2022

XIII Día da Ciencia en galego


Neste XIII Día da Ciencia en Galego os homenaxeados son Ángeles Alvariño e Evaristo Galois.
 
A galega Ángeles Alvariño foi a primeira muller a bordo dun barco británico de investigación en calidade de científica. Logo diso participou en varias expedicións polo Atlántico e o Pacífico.
Precursora na investigación oceanográfica española e destacada científica internacional, chegou a descubrir 22 especies novas de organismos mariños.
Se queredes saber máis sobre ela podedes consultar, na nosa biblioteca, o libro Galegas na Ciencia.
En Toc Toc-A Ciencia tedes ao voso dispor máis información sobre o Día da Ciencia en Galego.

28 outubro, 2022

28 O: Día mundial da animación


Como xa é costume, o noso compañeiro Severiano Casalderrey elaborou unha precisa escolla de curtas para celebrarmos o Día Internacional da Animación. Desde hoxe mesmo, durante os recreos, a entrada do noso IES convértese nunha improvisada sala de cine.

Aquí vos deixamos a proposta de Severiano:



Čuči čuči. Hush Hush Little Bear  (2022) de Mara Linina, está baseado nunha nana tradicional letona. Cut-outs (la sobre cristal), Stop Motion, artesanal. 6 minutos. Trailer en Youtube






Timeline (2021) de Osbert Parker.Documental con fotos propias de 5 minutos de duración. Trailer en Youtube





Steakhouse (2021) de Špela Čadež, curta de animación, 2D, CGI, cut-outs. Coprodución Eslovenia-Alemaña-Francia. Trailer en Youtube




 

 

The flying sailor (2022) animación canadense de Amanda Forbis e Wendy Tilby de 8 minutos de duración. 2D/3D CGI
Trailer en Youtube





Lucky man (2022) de Claude Lauyet, debuxo tradicional, 2D, CGI. Produción canadense de 5 minutos de duración.




Til we meet again (2022), obxectos animados e cut-outs. Produción estoniana de Ülo Pikkov de 14 minutos de duración.Trailer en Youtube





 

 

Night (2021) coprodución Alemaña-Xordania-Qatar-Palestina. Marionetas. 16 minutos de duración. Trailer en Youtube




 

 Beast (2021) produción chilena de Hugo Covarrubias. Bonecos de porcelana. 15 minutos. Trailer en Youtube



 Yallah (2021), Francia, Nayla Nassar, Édouard Pitula, Renaud de Sainta Albin, Cécile Adant, Anaïs Sassatelli e Candice Behague. 3D, CGI, 7 minutos.Trailer en Youtube

 

 

 

Orogènese (2021) produción francesa de Damien Barthas, Lise Delacroix, Emma Gaillien, Pierre Legargeant, Roland Van Hollebeke e Axel Vendrely. 3D, CGI, 7 minutos. Trailer en Youtube




 

 

Ice merchants (2022) coprodución Portugal, Reino Unido, Francia do director João Gonzalez. 2D, CGI. 14 minutos.Trailer en Youtube




 

The sausage run (2021) de Thomas Stellmach, coprodución alemá-belga. Debuxo tradicional, zootropos. 10 minutos.Trailer enYoutube





Lost brain (2021) produción suíza de Isabelle Favez. 2D, CGI. 6 minutos de duración. Trailer de Youtube

26 outubro, 2022

Marilar Aleixandre, Premio Nacional de Narrativa

Por segundo ano consecutivo, unha obra en galego foi a escollida para o Premio Nacional de Narrativa. O primeiro dos nosos autores en acadalo foi Alfedo Conde, con Xa vai o grifón no vento, ala polo 1986. Manuel Rivas, con Que me queres, amor? obtivo este galardón dez anos despois. E agora, por primeira vez en anos consecutivos, Marilar Aleixandre segue a estela de Xesús Fraga con (Virtudes e misterios)

Desde A Marela Tarabela, Parabéns, Marilar.

Imaxe: El País


24 outubro, 2022

24-O : Día das Bibliotecas. Ven vindo!

Un ano máis celebramos o Día das Bibliotecas, efeméride que nos lembra o importante papel que na formación integral do alumnado teñen as bibliotecas, baixo o lema “BiblioTEcoida”.


E para conmemorar tal evento, acordamos reeditar o vídeo Mario e a Biblioteca que no seu momento se realizou como homenaxe a Mario Pereira e o homónimo bautizo da biblioteca. O obxectivo desta reposición fica claro: Fomentar o uso integral das bibliotecas, co aquel da emotiva carta que Mario lle escribiu á Biblioteca, É o cuarto dos ratos... , publicada no número 1 do boletín da Biblioteca, A Marela Tarabela.

18 outubro, 2022

18-O Día das escritoras

 Como cada 18 de outubro, hoxe celebraremos o DÍA DAS ESCRITORAS, "para compensar a discriminación das mulleres na literatura" onde tradicionalmente exercían máis de musas que de escritoras.

"É importante reivindicar este día porque constantemente as mulleres do mundo da literatura, da cultura e da historia son esquecidas. E hoxe segue pasando. Son ignoradas nas listas dos mellores libros do ano, os programas culturais ou os estudos. Temos que loitar para que esas escritoras teñan o lugar que merecen. Hai que restablecer a verdade histórica", contábanos a escritora Laura Freixas no ano 2016, nunha entrevista para o diario El Mundo.

E precisamente para reivindicalas, desde a páxina de Bibliotecas Escolares de Galicia ofrécennos unha coidada selección de textos cos que traballar nas aulas. Nós, coa axuda dos nosos voluntarios  Aarón, Andrés, Breixo e Xoel montamos unha pequena exposición na entrada do Instituto, achegando, como tanto nos gusta, os libros a todo aquel que nos visita.







13 outubro, 2022

Semana da Saúde Mental

 A Federación Mundial para a Saúde Mental WFMH  fúndase  no ano 1948 para a  prevención de trastornos mentais e emocionais, o tratamento e coidado das persoas que os sofren e a prevención da saúde mental. 

Desde ese mesmo ano, todos os 10 de outubro se celebra o Día Mundial da Saúde Mental, mais no IES Aller Ulloa o Departamento de Bioloxía, coa súa profesora Ana Penas á cabeza, decidiu tratar esta problemática non un día senón unha semana, cunha serie de actividades das que iremos dando cumprida conta.

Para comezar deixámosvos unha imaxe da exposición de carteis tirados do perfil de instagram @nacidramatica .



10 outubro, 2022

Galicreques 2022

 O Festival Galicreques  volve ás rúas de Santiago de Compostela: ata o 16 deste mes poderemos desfrutar de 60 funcións a cargo de 26 compañías nacionais e internacionais, este ano con obras tamén pensadas para un público non só infantil.

Así mesmo, poderemos asistir a estes espectáculos en Culleredo (14 de outubro),  A Coruña (do 14 ao 16) e Betanzos e Carral (luns 16).



06 outubro, 2022

Aniversario de Instagram

 Instagram, a rede social que nos permite fisgar nas vidas alleas e expór a nosa cando nos convén, está hoxe de aniversario, 12 anos de vida.

Se tes curiosidades por saber que conta o noso Instagram só tes que picar no enlace