1974-2024, medio século de democracia

Tal día coma hoxe, fai xusto medio século, coa música de Grândola vila morena, o exército portugués botouse ás rúas, en son de paz. O pobo uniuse aos militares e os caraveis substituíron as balas. A ditadura caeu. Desde aquela, en Portugal " o povo é quem mais ordena".

Para que a Historia non se repita, para que as dúas ditaduras ibéricas que correron parellas, NUNCA MÁIS volvan aparecer nas nosas vidas, para que a nosa rapazada coñeza os feitos, reflexione e aprenda deles, a música do Zeca Afonso soará no IES Ramón María Aller Ulloa durante o tempo de lecer deste 25 de abril.

E se queredes ler algunha novidade, ou algún dos clásicos da literatura do país veciño, podedes ver unha pequena selección na entrada do IES ou rebuscar e/ou pedir axuda na sección 869.0 da Mario Pereira.

X Concurso Literario Mª Vitoria Taboada : o libro

 

Sara López Rodríguez

Unha vez máis comprácenos presentar a edición do libro cos textos premiados do Concurso Literario Mª Vitoria Taboada, nesta caso os correspondentes á X edición, con ilustracións achegadas por alumnado do Bacharelato de Artes.

Agardamos que sexa do voso agrado tanto a lectura dos textos premiados como as ilustracións complementares.

A seguir o libro dixital:

 

 

Monumento a Aller: Tempo de instalación

 

O monumento a Aller foi inaugurado o 4 de setembro de 1960. Francisco Asorey finaría o 2 de xullo de 1961. Trátase pois da última grande obra do escultor.

Esta foto que descubrimos hai pouco correspóndese, como vedes, co tempo da instalación. Tres homes que non podemos identificar (podería ser un o escultor, con 71 anos?) subidos aos rústicos andamios semellan darlle os últimos retoques. Faltan aínda os elementos metálicos: a esfera armilar, o nome ALLER e as lendas (CIENCIA, VIRTUD).

Os tres canteiros subidos na estada lémbrannos, neste día Mundial da Arte, a importancia dos oficios e a artesanía á beira das excelencias artísticas e científicas.

A devoción que o astrónomo lles profesaba, lembrabánola Vitorino Gutierrez Aller en 2009:

"Na senda do pai (que chegou a construír un harmonio), Don Ramón cultivaba, con especial predilección e habelencia, as artes manuais. Xa catedrático en Santiago, as súas compañías referentes en Lalín eran os artesáns: O ferreiro Lamego, o latoeiro de Venancio, o reloxeiro Vilariño e o carpinteiro de Lalín de Arriba.
Nomes e oficios que nos evocan un pequeno mundo de artesanía, no que tan comodamente se sentía o noso sabio e no que atopaba
aliados para mellorar o instrumental científico da época. Don Ramón “sentía devoción especial polos artesáns” e el mesmo era “un artesán de categoría”."

[Da foto soubemos grazas a Celso Fernández Sanmartín e proporcionóunola José Antonio González, Currás]

Xornadas de primeiros auxilios

Durante esta semana, o persoal docente e non docente do IES Aller Ulloa, puido asistir a dous obradoiros de primeiros auxilios. Begoña e Laura, sanitarias do 061, achegáronse ata o noso centro para formarnos na primeirísima axuda que podemos ofrecer a calquera persoa que estea a sufrir algún tipo de problema médico.

O martes centráronse en problemas de atragoamentos ou cortes importantes, practicamos a manobra de heimlich e taponamos hemorraxias con torniquetes profesionais e improvisados.

O xoves a práctica veu da man dos DEA e DESI, desfibriladores que poden salvar moitas vidas se os sabemos empregar.

Achegamos algunhas imaxes da actividade coordinada por Borja Costoya, profesor de Educación Física.

Marcapáxinas de elaboración propia

Desde hoxe mesmo, podedes levar da nosa biblioteca uns marcapáxinas orixinais, elaborados polo alumnado de FP Basica I, coordinado por Iria Ares e Ánxeles Francis.

Os marcapáxinas son  o produto  final, e máis vistoso, do traballo en Canva, empregando un glosario de termos informáticos básicos en inglés, que se insire dentro do PFPP, na liña desenvolta desde a Biblioteca.

Coa nosa xente : Lidia Cumplido Viéitez

Dámoslle hoxe a benvida á sección Coa nosa xente a Lidia Cumplido Viéitez, enfermeira de Educación Diabetolóxica no Hospital de Verín, co gallo de pór en práctica a idea dos taboleiros informativos sobre o azucre dos alimentos após un meticuloso traballo de investigación sobre a importancia dunha alimentación non só saudable senón consciente a través de diferentes ferramentas lúdicas na procura non só de informar senón que tamén de formar, misión na que a acompaña Gluci, a mascota da unidade creada con Intelixencia Artificial, pola propia Lidia.

Foto: https://www.enfermeriaourense.org/

A respecto do antedito, Lidia declara en entrevista ao Ilustre Colexio Oficial de Enfermería de Ourense que a finalidade na información exposta nun dos taboleiros do hospital de Verín non só se trata de ver números, senón que escoitamos ao paciente, adicámoslle tempo que é o máis valioso; engadindo información de impacto exposta no taboleiro como que comer 200 gramos de empanada equivale a 8 sobres de azucre.

Moitos parabéns e moito ánimo no teu bo facer profesional, Lidia.

A seguir a nosa Lidia cando o 2º do Bacharelato: 

Lidia en 2º Bac. 2006-07. Copyright IES Aller Ulloa

Literiatura (198) : Liniers (4)

Días de lluvia y libros

de Liniers en  El País Semanal (17/09/2017).

Literiatura [197] : Liniers (3)

El olor de los libros

de Liniers en El País Semanal(11/09/2016).

Encontro con Belén Montesa Lou

BELÉN MONTESA LOU, psicóloga do grupo Coidados-a-mente, estivo na Biblioteca do IES Ramón Mª Aller Ulloa, compartindo co profesorado unha charla sobre "educación sexual, e a promoción do respecto pola diversidade no entorno dixital no que se moven hoxe os mozos e as súas familias".

Como docentes, xórdennos, a diario, dúbidas e situacións que non sabemos solventar. A sexualidade é un dos temas que máis preocupa ao noso alumnado; segundo Belén Montesa, mesmo está entre os cinco primeiros. E nós, como profesorado, atopámonos cunhas etiquetas que non son máis ca iso, un nome sobre un papel. E que podemos ou debemos facer cando un adolescente require a nosa axuda? Aínda sen sermos especialistas, podemos ser a primeira persoa coa que queira falar, e para iso necesitamos unhas ferramentas mínimas.

A seguir, unhas fotos do grupo de traballo do PFPP, asistindo á ponencia de Belén Montesa, e algunhas das imaxes coas que traballou.

Referentes persoais

O alumnado de 1º do Bacharelato de Artes realizou un traballo sobre REFERENTES PERSOAIS CREATIVOS. 

Nun primeiro momento presentaron os seus referentes persoais: cineastas, ilustradores, deseño de videoxogos, escultura, arquitectura, manga, etc. Para logo realizar un proxecto artístico inspirado nestes referentes, adecuándose a unha temporalización establecida.

Pedro Alonso, profesor de Deseño

Este traballo deu lugar a unha exposición que poderedes visitar no vestíbulo do IES ata o 22 de marzo. 

A modo de adianto, algunhas imaxes, cortesía de Pedro Alonso.