Sábado 13: Nocturna, curtametraxes e entrega de premios.

Rematou Anirmau 13. Como ramo e antes da entrega de premios (que será ás 8.30 da tarde e incluirá a proxección do filme gañador), dous -ou tres- agasallos: O primeiro para os máis pequenos: ás 4,30 da tarde, Nocturna e, ás 6,30 da tarde, dúas breves sesións de curtametraxes.

Nocturna

Trátase dun dos grandes títulos da factoría Filmax: un precioso relato de enfoque fantástico infantil, con  sobresalientes pinceladas poéticas. Gañador do Premio Goya e seleccionado prestixioso festival de Annecy.

Nun vello orfanato os días pasan sen problemas, mais as noites son algo moi diferente, polo menos para Tim. A luz reflectida polas estrelas é a única cura para o medo á escuridade. Unha noite, ese medo lévao a azotea, onde descobre que a súa estrela favorita desapareceu.

Tim decide ir na súa procura. Nesas, coñece o Pastor de Gatos e o seu fiel amigo Tobermory, que se converterán nos seus gardiáns persoais e o axudarán a fuxir do orfanato.

Carta branca: Animazine: as mellores curtametraxes españolas

Ás 6,30 e en colaboración co Festival de Málaga de Cine Español, o principal festival especializado en cinema español, ofrecemos esta sesión na que poderán verse catro das curtas españolas máis recoñecidas dos dous últimos anos: Sen dúbida, una colaboración única co principal festival especializado en cinema español no noso país. As curtas, inéditas no festival, son Bendito Machine IV (2012), Rascayú (2011), The End (2011) e Fuga (2012), esta última a gañadora no festival malagueño

Panorama Galiza

Ás 7, Panorama Galiza, grazas ao apoio dos autores de da Academia Galega do Audiovisual, as mellores curtas galegas do ano:

Adelina ( animación dun tema da banda Linho do Cuco) ; O templo da Veracruz ( documental de Anxo Santomil) e os tres dos nomeados aos Premios Mestre Mateo 2013: Only You, Equilibrium e O Xigante (gañadora).

Venres 12: It's such a beautiful day, Dwae-ji-ui Wang e Jez Jerzi

 
Tres películas para este venres. Á 6 da tarde It's such a beautiful day (2012), do estadounidense  Don Hertzfeldt. Ás 9, a surcoreana Dwae-ji-ui Wang (O rei dos porcos) de Sang-ho Yeun. Ás 12 da noite, xa para adultos, desde Polonia, Jez Jerzi de Wojtek Wawszczyk, Jakub Tarkowski e Tomasz Lesniak.

A primeira delas é estrea absoluta en España e a presenza das outras dúas supoñen o seu segundo pase: antes só puideron verse en Sitges 2012 e Animabasauri 2012, respectivamente.

It's such a beautiful day

EE.UU. / 2012 / 62’ / Tradicional, Pixilación, Técnicas fotográficas, 2D CGI. Unha triloxía vital sobre Bill, un home novo cunha vida aparentemente normal, mais que, pouco e pouco, vai escurecéndose pola aparición dun trastorno mental aparentemente grave. Unha serie de inquietantes situacións farano reconsiderar o sentido da vida.
Primeiro, aparecen os seus problemas de memoria, ademais de verse angustiado por inquietantes visións. Despois, terá que encarar a perda dun ser querido, un golpe máis que afectará á súa recuperación.
Finalmente, Bill atoparase nun hospital loitando cos seus problemas de memoria nun intento de recompoñer toda a súa psique.

Ficha completa, trailer e fotogramas en Anirmau.com

Dwae-ji-ui Wan (O rei dos porcos)

COREA DO SUR/ 2011 / 97’ / 2D CGI. Despois de asasinar a súa esposa, Hwang Kyung-min, un home de negocios ao bordo da bancarrota, reencóntrase cun antigo compañeiro de clase, Jung Jong-suk, ao que non viu en quince anos. Durante a cea, rememoran os seus días de escola, ocultando a súa situación actual.
Xa daquela existían diferenzas de clase entre os estudantes. Adoitaban chamar “os cans” a un grupo de alumnos crueis, máis ricos e triunfadores do normal, que coas súas novatadas e intimidacións exercían un reinado de terror sobre os estudantes máis débiles: “os porcos”.

Ficha completa, trailer e fotogramas en Anirmau.com

Jez Jerzy

Mauricio, o Ourizo, un mullereiro empedernido, fan do skate e das canecas de cervexa entre horas, convértese no punto de mira dun plan de manipulación xenética. Un científico tolo contrata dous inimigos mortais de Mauricio, os skinheads Zenek e Stefan, que deben apoderarse dos seus xenes para crear un clon ourizo.
Tras traballos nun laboratorio secreto, o clon nace e, de súpeto, convértese nun ídolo de masas, complicando seriamente a vida de Mauricio e arruinando a súa reputación no acto. O ourizo deberá defender a súa identidade e, sobre todo, a súa amada Jola.

Ficha completa, trailer e fotogramas en Anirmau.com


Descarga a programación completa (PDF)
-

Xoves 11: Az ember tragédiája e Gartxot

Á hora habitual das nove da noite, a película a concurso é Az ember tragédiája (A traxedia do home) do húngaro Marcell Jankovics, tamén estrea absoluta en España.

Pola mañá, ás 10, realizarase a primeira proxección de Gartxot(2011), dirixida por Asisko Urmeneta e Juanjo Elordi.

Az ember tragédiája

HUNGRÍA, 2011 / 159’ / Tradicional, 2/3D. Velaquí a historia do universo ao longo de 15 cadros. A narración iníciase coa creación do mundo, dando paso á viaxe de Adán e Eva a través do espazo e do tempo na busca do sentido da vida. O propio Lucifer será a súa guía. O seu camiño, iniciado no Paraíso, percorrerá os tempos prehistóricos, o antigo Exipto, Grecia, Roma, o Imperio Bizantino, a Praga de Kepler, a Revolución Francesa e o Londres do século XIX. Chegará a repasar os últimos cento cincuenta anos de Europa e aínda anticipará unha visión do futuro.

Ficha completa, trailer e fotogramas en Anirmau.com

 

Gartxot 

ESPAÑA / 2011 / 85’ / 2D CGI. É o século XII en Navarra e o Camiño de Santiago está en pleno apoxeo. O novo abade de Roncesvales desterra a Gartxot, o bardo local, para quedar coa voz prodixiosa do seu fillo Mikelot e convertelo nun monxe cantor. Mikelot consegue escapar do convento e canta de novo xunto ao seu pai. Os seus cantos convértense nun símbolo contra a opresión. A Igrexa non está disposta a aceptar esa afronta e envía os seus temidos monxes guerreiros á caza do bardo. Así comeza a traxedia, así comeza a conquista.

Descarga a programación completa (PDF)
-

Mércores 10: Taevalaul e Midori-Ko

No segundo día de competición poderemos gozar de dous filmes de moi diferente factura e procedencia. Lembremos, a este respecto, que un dos obxectivos do festival é mostrar a extraordinaria diversidade do cinema de animación.
 
Ás nove da noite, veremos a película estonia Taevalaul, con dirección e guión de Mati Kütt. É estrea absoluta en Galiza e segundo pase en España (ata o de agora só puido ser vista en Sitges).

Taevalaul

Estonia / 2010 / 45’ / Monicreques. É posible chegar á lúa nun suspiro? Pois é. Éo, sempre e cando, ademais da formación necesaria, se teña a vontade de voar. Este é o caso do Carteiro Choiva.
Esta non semella ser máis que a viaxe dun carteiro que debe entregar un paquete á Lúa. Mais é tamén unha viaxe filosófica a través do tempo e as épocas, a través da persoas e os personaxes, a través dos pensamentos e a imaxinación. Esta é a visualización dos anhelos dun carteiro que cumpre co seu deber, a pesar de todos os problemas e distraccións.

Midori-Ko

A seguir e tras un descansiño, aí contra as 10, será o momento da xaponexa Midori-Ko de Keita Kurosaka, que se proxectará en España, por primeira vez.

XAPÓN/ 2010 / 55’ / Tradicional. En anticipación á crise alimentaria que vén, cinco científicos están a traballar para desenvolver un “alimento-soño”, unha mestura de carne e vexetais. Pero o progreso no laboratorio, situado no medio dunha zona comercial abandonada, acadou unha rúa sen saída.
Un día, nas primeiras horas da noite, unha columna de luz penetra no laboratorio. Esta é a luz dun ceo estrelado especial que enfeita a Terra unha vez cada dez mil anos. Os científicos están moi felices co que a tremenda forza da luz produciu: o alimento-soño, é dicir, Midori-ko.

Pola mañá continuaremos con Tadeo Jones.

Descarga a programación completa (PDF)
- 

Martes 9: Ánima Buenos Aires

Ás nove da noite, comezan as proxeccións dos filmes en competición con Ánima Buenos Aires, película arxentina de 2012, dirixida por María Verónica Ramírez, que é estrea en España.

Ánima Buenos Aires

ARXENTINA / 2012 / 92’ / Tradicional, Acción real, Cut-outs, Colaxe, Pixilación. Humor, tango e emoción conseguen mesturarse na alma oculta de Buenos Aires. Catro relatos que reflicten os diferentes perfís e recantos da cidade dende distintas e orixinais estéticas.Unha parella de bailaríns conecta as diferentes historias mediante coreografías animadas nas paredes porteñas. Carniceiros de barrio abafados pola competencia, adolescentes que pintan a cidade coas cores do seu amor, criminais moribundos que lembran nun segundo toda a súa vida e lendas de tango sobre a muller soñada.

Ficha completa, trailer e fotogramas en Anirmau.com

Una ciudad para dibujar, entrevista con María Verónica Ramírez en La Nación.


Pola mañá continuaremos con Tadeo Jones.

Descarga a programación completa (PDF)
- 

Luns 8: O apóstolo e Tadeo Jones

Xa entramos en danza. Anirmau'13 quenta motores con dous filmes excepcionais.

O apóstolo

Ás oito da noite preséntase o festival e, de inmediato, proxéctase O apóstolo de Fernando Cortizo.

ESPAÑA / 2012 / 82’ / Monicreques. Un preso que acaba de fuxir do cárcere intentará recuperar un botín agochado anos atrás nunha solitaria e afastada aldea do Camiño de Santiago, pero o que alí vai atopar suporalle un castigo aínda maior do que tiña. Sinistros anciáns, estrañas desaparicións, espíritos, un peculiar sacerdote e ata o mesmísimo arcipreste de Santiago cruzaranse no seu camiño nunha historia de suspense, humor e fantasía.

Las aventuras de Tadeo Jones

Antes diso, ás dez da mañá, será a vez de Las aventuras de Tadeo Jones de Enrique Gato, película que se repetirá o martes e o mércores, tamén ás dez. Os asistentes serán dos colexios de primaria da zona. 

ESPAÑA / 2012 / 90’ / 3D CGI. Tadeo sempre desexou converterse nun arqueólogo aventureiro e famoso. Ao seu pesar, pasa os días entre os guindastres e o cemento da obra na que traballa. 
A oportunidade de cumprir os seus soños preséntase cando un reputado arqueólogo, amigo seu, recibe unha misteriosa táboa de pedra: a chave que conduce á Cidade Perdida de Paititi e ao seu lendario tesouro. A piques de emprender a viaxe, o arqueólogo sofre un inoportuno accidente e Tadeo debe substituílo na expedición.

Este ano irémosvos avanzando a programación diaria, mentres tanto, podedes descargar a programación completa (PDF)
-

Os 7 de Anirmau'13

Sete serán os filmes proxectados neste noso Anirmau'13, a primeira edición deste festival dedicada á longametraxe.

O xurado  que os seleccionou estivo composto por:

Emilio de la Rosa, director, produtor e profesor de animación na prestixiosa escola madrileña ESDIP, ademais de destacado historiador do cinema de animación.

Manuel Pena, director, guionista e produtor galego de curtametraxes. A súa cinta “A canción de Fémerlin” (2005) tivo un grande éxito en festivais de todo o mundo. Dirixe o festival de curtametraxes FIC-Bueu que chegou á súa 6ª edición.

Inmaculada Castaño, delegada de Filmax en Galicia, tamén desempeña labores de produción nos filmes galegos da compañía, entre eles “The Way” (2010), ou a animada “Copito de nieve” (2012).

Unha selección plural, con estreas absolutas.

As sete películas configuran un selecto programa caracterizado, en palabras do director do festival,  "pola súa diversidade xeográfica e cultural, ademais de tratarse de novidades case todas elas en España". 
De feito, catro delas son estrea absoluta en España e todas as sete serán proxectadas por primeira vez en Galiza. Trátese de cintas que ata o de agora só se puideron ver nos festivais máis prestixiosos do mundo, entre eles Cannes, Annecy, Ottawa, Sitges, Karlovy Vary, Bruselas, Stuttgart, Taipei, Espinho ou Lisboa.

As películas:

Ánima Buenos Aires (María Verónica Ramírez, 2012) -imdb-

 


 
Az ember Tragédiája (Marcell Jankovics, 2011) -imdb-

 
 

Dwae-Ji-Ui Wang (Yeun Sang-Ho, 2011) -imdb-

 
 
It’s Such a beautiful day (Don Herzfeld, 2012) -imdb-


 
 
Jez Jerzy (Wojtek Wawaszczyk - Jakub Tarkowski - Tomasz Lesniak, 2011) -imdb-

 
 
Midori-Ko (Keita Kurosaka, 2010) -imdb-

 
 
Taevalaul (Mati Kütt, 2010) -imdb-
 

 
  

Anirmau '13

Nesta súa terceira edición, ANIRMAU ofrece unha importante variación: tras dous anos dedicado ás curtametraxes, deste vez consagrábase ás longas. E presentarase algunha? Dez, sería un bo número -dicíanos Seve.

ANIRMAU (3ª ed.) e Animabasauri (9ª ed.), son -dentro do estado- os únicos festivais de animación especializados que contan cunha competición de longametraxes.

A eles cómpre sumar os tres festivais de cinema de ámbito xeral e grandes orzamentos que acollen seccións específicas para as longas animadas (Sitges -con Anima’t-,  Gijón -con Animaficx- ou Málaga -con Animazine-).

Entre uns e outros, son unicamente cinco festivais nos que se poden ver longametraxes de animación.

A esta primeira experiencia coa longa, responderon 15 películas das que se descartaron dúas por non cumpriren as bases.

Estas son as que conformarán o programa:

• Jean de la lune (Stephan Schesch, 2012)
• George the hedgehog (Tomasz Lesniak – Jakub Tarkowski – Wojtek Waswzczyk, 2011)
• Heart string marionette (M. dot Strange, 2012)
• Legends of Valhala: Thor (Óskar Jónasson – Toby Gnekel – Gunnar Karlsson, 2011)
• Lotte and the moonstone secret (Heiki Ernits - Janno Põldma, 2011)
• Midori-ko (Keita Kurosaka, 2010)
• La leyenda de la llorona (Alberto Rodríguez, 2011)
• Taevalaul [Sky Song] (Mati Kütt, 2010)
• Ánima Buenos Aires (María Verónica Ramírez, 2012)
• It's such a beautiful day (Don Hertzfeldt, 2012)
• The tragedy of man (Marcell Jankovics, 2011)
• Fimfárum III (Kristina Dufková – Vlasta Pospílová – David Sukup, 2011)
• The king of pigs (Yeun Sang-ho, 2011)

Por outra banda, é de notar que, malia non facermos convocatoria para curtas, presentáronse setenta e unha. Isto anímanos a pensar que o festival está moi consolidado e que, cando volvamos ás curtas, a resposta será tan boa como a que viñemos obtendo ata agora.

E xa sabedes, atención á páxina oficial de Anirmau.