[Rescate V] e na que vai, vai unha persoal (disimulade)

Pero para a maioría dos escritores, malia non seren formidables os fondos dunha biblioteca, só o feito de que, ao parecer, os libros son innumerábeis e están a disposición de quen os solicita supón unha alegría: "Souben que aquilo era unha bendición -escribiu Eudora Welty ao final da súa vida-, sóubeno naquel momento. O gusto non é tan importante, chega co tempo. E eu quería ler inmediatamente. O meu único temor era que os libros se acabasen"

Manguel, Alberto: La biblioteca de noche. Madrid :Alianza, 2006. p.151 (trad.)

Alá polo 79, eu estaba en COU e o Instituto estreaba o seu actual emprazamento. A profesora de literatura española regaloume dous libros. Daquela eu devoraba a Poesía Completa de Celso Emilio (a editada por Akal) e ameazaba con memorizala redonda. Josefina debeu considerar que xa debía dar un paso máis e agasalloume con dous títulos de Pexegueiro. Atinou: eses eran os libros que eu -ignorante de que existían- desexaba.

E transcorreron 30 anos...

Aí atrás, o meu compañeiro Carlos (o arquiteuto deste Blogue) estaba baleirando as bolsas nas que traía as últimas adquisicións para a biblioteca . Cando entrei nela, escolleu un dos libros e díxome que o comprara porque se lembrara de min. Era La biblioteca de noche de Alberto Manguel, irmán maior dos biblioadictos (é esta a palabra que emprega o noso Firmin? Gora Sam Firmin!). Carlos papouno en dous días, a min levoume algo máis porque non quería que rematase.

Trátase dunha historia de libros, lectores e bibliotecas; unha chea de noticias, reflexións e datos que eu xa sabía, malia non saber que os sabía ata que Manguel mos foi descubrindo; unha cordial galería de espellos na que os teimudos das bibliotecas nos imos reflectindo e multiplicando. Que sei eu cantos voltas lle levo dando á cabeciña estimulado polas páxinas de Manguel!

Van alá trinta anos. Estou seguro de que a nosa biblioteca debe entrar nunha nova etapa. Estivemos nunha actividade que comezou titulándose “Trinta anos non son nada”. Vaia casualidade! Será que o círculo se cerra? Ou é espiral? Se cadra é que aquel medo infantil de Eudora Welty a que os libros se acabasen mantense como medo bradburyano a que, efectivamente, os libros se acaben. E, nesas condicións, quen nos desintoxica de libros e bibliotecas?

Ata o curso e grazas pola compañía que nos fixestes!

Mario.

Balance de préstamos externos: 2672

Un dos datos obxectivos que nos permiten avaliar a marcha da Biblioteca é o servizo de préstamos externos (aqueles que a comunidade escolar leva para a casa). Non temos claro o grao de significación que representa, pero -signifique o que signifique- a evolución nos tres últimos cursos non é negativa.

Con todo, hai varias cousas que debemos reconsiderar. Por exemplo: máis da metade dos préstamos do alumnado corresponde aos dous primeiros cursos da ESO.

Dezaseis mil rexistros: O mundo, 1936

Tras catalogarmos 1.068 documentos este curso, superamos o rexistro 16.000 (o 23 de xuño). Por primeira vez reservamos un número tan redondo para un documento especial. Tocoulle a un Mapamundi escolar, editado en1936. 
 


Houbo varias razóns para facérmolo:

• Séguennos gustando os vellos mapas murais, a pesar de que as novas tecnoloxías os vaian deixando nun recanto. E este é un dos máis vellos que temos.
• A súa información (mesmo os rachóns) séguenos parecendo válida.
• Temos un compromiso antigo con eles: ano tras ano, propoñémonos catalogalos e sempre os sacrificamos ante as últimas adquisicións.
• Gústanos pensar nos ollos que os miraron e permítennos imaxinar todos os seus “compañeiros” que “desapareceron”..., e os lugares a onde foron, e as mans que nolos levaron, e...

Son cousas lindas os mapas!

[Rescate IV] Camba, 1979

Entre as publicacións que as Comarcas (Deza, Trasdeza e Camba) ofreceron á Transición, é de significar Semente.

Semente é o boletín da Asociación da Mocedade “O fiadeiro”, aquela que tivera como presidente a Xabier Vence Deza.
 

Reivindicación nacional, reivindicación rural e reivindicación do orgullo cambote son as liñas centrais que a inspiran.

Pronto a teremos completamente dixitalizada, pero mentres podedes consultar os tres primeiros números premendo nas seguintes ligazóns:

Semente 1.

Semente 2.

Semente 3 (Lectura imprescindible para os interesados nunha ontoloxía do pasotismo e das discotecas)

Magazine Challenge – Feedback

This year we have changed the Magazine Race into a Magazine Challenge. It’s been probably a bit more difficult, but we thought it would be more interesting. Over 100 students handed in the questionnaires – 44 from 1º/2º ESO, 16 from 3º/4º ESO, and 49 form Bacharelato - and a lot of questionnaires were correct in spite of some spelling and grammar mistakes. In fact, we had to draw lots to choose the winners, who were:

- Rubén Iglesias (2º D de ESO)

- Javiera Cortés (3º A de ESO)

- Beatriz Jácome (1º B de Bach)

They were given an English reader with CD and a free snack at the school canteen for a week. We hope to have our contests next near again. See you!