Ao fío de... Exposición de carteis do Día do libro

O 23 de abril celebramos o Día internacional do libro e dos dereitos de autor, e o noso alumnado de Artes aproveitou para facer unha clase práctica coa súa profesora de Deseño, María Armada, e criticar, de maneira construtiva, os diferentes carteis, tal e como deixamos constancia no seu momento (ver enlace).

Agora xa vos podemos achegar as súas propostas para o cartel do Día do libro 2023. De momento son bosquexos, así nolo recordan os seus autores e autoras. Polo deseño definitivo teremos que esperar ata abril.

 Estes bosquexos xa teñen o seu sitio nos corredores do Instituto, a carón da figura homenaxeada nestas Letras Galegas 2022.

Letras Galegas 2022

FLORENCIO DELGADO GURRIARÁN (Córgomo, Vilamartín de Valdeorras, 1903) foi un deses nosos escritores que despois do 36 tiveron que fuxir de Galicia posto que "xa tiña escrito poemas de interese sociolingüístico e político, mais algún traballo en prosa coa agulla crítica posta na política caciquil e centralista". Tras pasar por Francia (1939) acabará no exilio mexicano.

Tal e como sinala Ricardo Gurriarán "salientamos o papel de Florencio Delgado Gurriarán como figura integradora e unitaria dentro do corpo activo do exilio, sen perder a identidade galeguista, ao tempo de servir de ponte co interior. Neste sentido foi importante o seu interese para abrir as publicacións a colaboradores externos e para que fosen máis alá do ámbito literario, cunha teima especial pola pureza e a unificación lingüística".

O alumnado integrante dos nosos clubs de lectura ABCD e  Rabo Rizado quixo participar na homenaxe ao escritor valdeorrés, colocando os carteis polo centro. 

Pola súa banda, o alumnado de Deseño pegou os seus bosquexos para un futuro cartel publicitario. Xa temos o adianto do que pode ser o cartel do Día do Libro 2023.

Literiatura [180] : Jared Muralt

[Ascensión]

Jared Muralt en Resista

rt

Marela para "Golpes de luz"

Ao fío da elección por parte do Club de lectura do profesorado da lectura da novela Golpes de luz de Ledicia Costas, editamos unha nova Guía de lectura, a nº 19, que se corresponde coa Marela nº 31, dedicada neste caso á antedita novela, e que o Club de lectura cualifica de thriller cun forte compoñente social narrado por tres xeracións con diferentes formas de entender o mundo polas súas circunstancias vitais e a súa idade, pois Luz non é unha avoa como as demais, sendo a figura matriarcal dunha familia que nos fai rememorar os tempos da infancia e na que Luz marca o ritmo desta trama grazas ao seu fiel compañeiro: o martelo. Presentándonos un retrato denso e profundo dunha familia na que o lector pasa a formar parte dos diferentes matices de perspectiva persoal e de franxas de idade.

Lembrade que podedes descargala en PDF.

 Para máis información visitade o Wikirmau.

 

 

"As Ramonas", con Ana Cabaleiro

Achégase a fin do curso e parece que, tamén, da pandemia, así que o alumnado dos clubs de lectura Tarabelos I e II puido gozar dunha xornada lúdico-artística polas terras de Trasdeza.

A primeira parada foi o MOSTEIRO DE CARBOEIRO. Alí, da man de  Xesús e Núria, integrantes de Tesouros novos, coñeceron como se foi construíndo o edificio, o paso do románico serodio ao gótico cos diferentes tipos de arcos e bóvedas; viron os restos da policromía que cubría as paredes  interiores; estudaron as ábsidas e rosetóns;  convertéronse no Abade Fernando por un momento, co seu báculo e mitra; descubriron os gravados (os auténticos e as mostras de vandalismo) e coñeceron a historia deste singular edificio desde as súas orixes no século X, símbolo do poder nobiliario relixioso, ata a reconstrución actual, pasando pola desamortización, o período de abandono total, o espolio e o vandalismo.

Xa fóra do edificio, na aula de interpretación, xogaron a ser mestres de obra e canteiros e levantaron, peza a peza, unha maqueta do edificio. Mais, antes tiveron que aprender a facer arcos de medio punto e apuntalados, e conseguir que ao quitar o acimbre de madeira a clave aguantase ben e o arco non se derrubase.

 

A media mañá, o grupo deixou atrás o claustro e o recinto relixioso para seguir a canle do RÍO DEZA atendendo as explicacións do seu profesor de Educación Física, Borja Costoya. Por veces, o camiño non resultaba fácil, as pedras estaban esvaradías e as silvas convertíanse en soltas naturais que había que evitar. Pero a paisaxe ben o valía.

E tras xantar na Área Recreativa A Carixa a rapazada só podía encamiñarse cara á FERVENZA DO TOXA. Non por coñecidas estas augas deixaron de resultarlles menos atractivas, así que mollaron as mans (para os pés estaban demasiado frías), tiraron fotos, subiron ao miradoiro... e gozaron do sol.

Finalmente, pasadas as tres e media da tarde, a escritora que, dalgunha maneira, propiciou todo isto, estaba a esperarnos na vella ESTACIÓN DO TREN DE ABADES.

Grazas a ANA CABALEIRO e á súa novela As Ramonas, todas e todos nos convertemos en Mona Otero e fomos facendo o seu percorrido vital: Estación de Abades (aínda que para o Adif era Bandeira), estación de Castro (a máis deteriorada de todas elas), taberna de Lola, campo da festa de Saídres e estación de Ponte. 

Carmen Frade e Adriana Iglesias, coordinadoras dos clubs de lectura, guiáronnos ao longo destes dous meses de lectura. Nesta tarde de tronos, pero sen auga, Ana Cabaleiro resolveu as nosas dúbidas e fíxonos reflexionar sobre o paso do tempo, o bonito e o feo das nosas orixes, o que queremos deixar atrás... E ata nos pediu que fósemos Mona Otero, que nos convertésemos nesa muller creativa e construísemos a nosa fotografía persoal.

 

E como adoita pasar nestes casos, cando as cousas saen ben, os rapaces preguntan pola próxima. A modo de exemplo, deixámosvos o comentario que nos fixo chegar Álex Sucasas, un dos participantes no itinerario lector:

"Gustoume moito o itinerario ao Mosteiro de Carboeiro e á Fervenza do Toxa, xa que permite desinhibirte das dificultades do centro educativo e vivir novas experiencias. Fíxome posible volver saír á natureza en grupo, descubrindo zonas e detalles da contorna e ollalos con abraiante beleza.

Estar na natureza é agradábel, faite desconectar, vivir o momento con quen estás, socializar e, o máis importante, ter cousas boas que contarlle á xente e aconsellala para que fagan a mesma ruta sós/soas ou acompañad@s. No meu caso, ao día seguinte da excursión tiña un exame, e durante este tempo vin as cousas máis positivas con respecto ao que quería facer nesa proba e as miñas expectativas. 

Outra cousa é o subidón que recibe o teu corpo ao camiñar. 

Se dispuxésemos de, polo menos, en cada trimestre de tres saídas, aumentarían as nosas expectativas e ánimo para estudar, pois serían nove paradas no camiño do curso que abafa ao estudante".

E a propia Ana Cabaleiro tamén nos fixo chegar a súa impresión da actividade:

"Unha das cousas máis marabillosas que me pasaron este mes de abril foi compartir o roteiro de AS RAMONAS con alumnado do IES Aller Ulloa de Lalín.

Grazas a todxs por "xogar" a ser Mona Otero durante toda unha tarde e percorrer os escenarios da súa historia literaria coa mente aberta.

Grazas a Carmen e Uxía, as profas que o fixeron posible.

E se as "creacións" que xurdiron deste roteiro frutifican en formato libro, eu quero ir á festa de presentación!!

Facebook de Ana Cabaleiro

Pola nosa parte, non podemos dicir máis que grazas Ana, moitas grazas por prestármonos o teu tempo e axudármonos a empezar a ser escritores e escritoras.