Seis días despois, seguen a chegarnos testemuños do que sucedeu o derradeiro día lectivo do 2023 no IES Ramón María Aller Ulloa, neste caso en forma de vídeo.
Se queredes ver como transcorreu o mercado de comida e produtos de segunda man, picade na ligazón para irdes á nosa canle de Youtube.
O alumnado de Relixión, coa súa profesora María Jesús Barcala á fronte, quixo felicitar estas festas aos usuarios da Residencia As Dores. Durante esta semana estiveron deseñando e elaborando as postais personalizadas, para que os 144 usuarios do centro puidesen recibir cadansúa felicitación.
Nestes momentos nos que o consumismo nos devora, nos que guerras inxustificables deixan milleiros de mortos día si e día tamén, nos que un estudante pode asasinar os seus compañeiros indiscriminadamente... Nestes momentos María quixo educar en valores.
Agradecemos á Dirección do centro residencial que nos permitise formar parte desta actividade, para comezar así unha colaboración entre a enerxía e ilusión dos adolescentes e a sabedoría dos nosos anciáns.
Este xoves 21, aproveitando que era o último día lectivo do 2023, organizáronse unha serie de actividades lúdicas e deportivas. Baixo a coordinación de ANA PENAS FACORRO, desde as 10:25 da mañá, o salón de actos do IES Aller Ulloa converteuse nun gran mercado no que se ofertaban sobremesas caseiras, algodón de azucre, produtos de segunda man...
Pero este espazo non foi o único que cambiou o seu uso habitual, así nalgunhas aulas podíase participar no concurso "Cifras e Letras", noutras o karaoke permitía descubrir grandes voces, e ao lado xogaban ao tenis de mesa; mentras que no patio un Papá Noel un tanto curioso (cortesía do alumnado de Deseño) recibía tortazos a cambio dunhas moediñas e algúns apostaban a que eran os máis rápidos no concurso americano de vasos.
Xa nas dúas últimas horas lectivas a festa trasladouse ao pavillón, e formando equipos mixtos, profesorado e alumnado enfrontáronse no baloncesto, balonmán, balonvolea e fútbol sala.
A festa durou unha mañá, pero o traballo de toda unha semana puido verse perfectamente reflictido na decoración das portas das aulas. 4º ESO A e 3º ESO B, coordinados por Gonzalo Ballesteros e Sylvia Cea conseguiron as mellores puntuacións.
A seguir, algunhas das imaxes que Carmen Frade e Sofía Ardariz nos fixeron chegar:
Como xa é tradición no IES Ramón María Aller Ulloa, queremos felicitarvos o nadal cunha postal de factura propia. Para isto, o Departamento de Artes organiza un concurso entre o alumnado, seleccionando, nesta ocasión, o traballo presentado pola alumna do 1º curso do Bacharelato de Artes (grupo B) Julieta Ramos Sosa.
En palabras da profesora María Armada, como voz do xurado, este "considerou salientable o uso da cor; así mesmo, a representacicón da pelaxe do animal e a composición son destacables".
Os nosos parabéns a Julieta.
Unha vez que terminamos a ESO que podemos facer? Seguimos co Bacharelato ou cursamos un Ciclo Medio? E se temos claro que imos estudar algún Ciclo Superior, que é mellor, facer antes un Medio ou o Bacharelato? Para responder a estas preguntas, e aclarar algo as dúbidas que o noso alumnado pode ter, organizamos unha mesa redonda con tres alumnos e dous profesores do noso centro:
Gonzalo Soto Lourido, alumno do 2º curso do Ciclo Medio de SMR, que accedeu ao C.M. a través da Formación Profesional Básica, e despois de traballar na hostalería durante varios anos. Neste curso 23-24 está seleccionado para formar parte do Programa Erasmus, facendo as súas prácticas de fin de Ciclo en Malta.
Yago García Jorge, que cursa o 1º ano do Ciclo Superior de DAW, e que despois de abandonar o Bacharelato cursou xa un Ciclo Medio no IES Ramón Mª Aller Ulloa. Yago estivo, a principios do 2023, case 4 meses vivindo e traballando en Malta, grazas ao Programa Erasmus, cunha asignación mensual de 1.300 €
Sunny Saco Buceta, alumna do 2º ano do Ciclo Superior de ASIR, e que accedeu aos ciclos tras facer o Bacharelato, obtivo a medalla de prata nas Galicia Skills neste mes de outubro (ver a entrada no noso blog)
Moderando a mesa, e completando a información que achegaba o alumnado, estaban os profesores José Rey, encargado no 23-24 de buscar empresas en Malta, e titor de ASIR; e Joaquín Pérez, responsable da Formación en Centros de Traballo e dos Programas Erasmus nos que participa o noso instituto.
Se tedes interese en informarvos sobre toda a oferta que a Formación Profesional ten en Galicia, podedes picar nas seguintes ligazóns:
A seguir, unhas fotografías do acto, cortesía de Ánxeles Francis.
 |
Gonzalo explicando a súa experiencia persoal. |
 |
| Sunny durante a súa intervención. |
 |
| Yago explicando en que consisten os Programas Erasmus. |
A nosa radio segue funcionando a pleno rendemento. Desta vez foi o alumnado de 2º do Bacharelato, coordinado desde o equipo da Biblioteca, o que puido entrevistar a Warenka Mora Aponte, unha das profesoras de inglés na nosa EOI e cun historia vital coas linguas, cando menos, curioso.
Warenka naceu en México, e o seu nome é produto do amor que seu pai sentía pola lingua rusa. Xa de adolescente viviu durante un ano en Francia, grazas a un programa de intercambio de estudantes, organizado por AFS. E no seu percorrido universitario decantouse polo estudo do inglés, pero o amor cruzouse na súa vida e ela cruzou o charco.
E nós non iamos desperdiciar esta ocasión de aprender doutras culturas, neste caso centrándonos nas tradicións mexicanas arredor da morte. Aquí vos deixamos a ligazón á entrevista que lle fixeron Alejandro Calviño, Carla Fernández, Leticia Fernández, Lucía Maceira, Fabiana Núñez e Juan Ramón Villar.
O Departamento de Educación Física optou esta semana por facer deporte ao aire libre (que mellor opción?), así que convidou o alumnado de 3º ESO a participar nunha ruta de sendeirismo polos bosques de ribeira dos ríos Deza, Asneiro e Santa Lucía: pontes romanas, ou colgantes, estreitas pasarelas, pequenas fervenzas, congostras ou anchas ribeiras polas que camiñar, seguindo o curso dos ríos e observando os muíños que, nalgún tempo, traballaron arreo.
Mais, á hora de organizar esta saída escolar, non só se pensou na actividade física, senón tamén na necesidade que teñen os nosos rapaces de coñeceren a fauna e flora que habita arredor dos ríos, así que a segunda parte da travesía transcorreu por bosques de frondosas na Borralla, fermosas carballeiras que no outono cobren o seu chan de follas amarelas e acastañadas. Á beira dos carballos, bidueiros xa espidos, pero coa inconfundible tona abrancazada; edras, fentos e fentas, musgos, liques, e algunha silva de cando en vez.
De seguro que os rapaces agradeceron a Borja Costoya e Xavier Montoto cambiar o frío pavillón (ao que, ironías da vida, non chega a calefacción de biomasa) por esas frescas ribeiras das concas fluvias de Deza.
Fotografías: Borja Costoya
Desde hoxe mesmo, como manda a tradición, e ata o xoves 21, na entrada do noso instituto, e no recuncho TOC-TOC-A-CIENCIA, podedes desfrutar dunha exposición sobre mulleres científicas.
Baixo a apariencia dun calendario de advento, podemos ver o traballo do alumnado de 3º ESO A e C, que nas horas do Proxecto Competencial buscou e seleccionou información sobre 20 mulleres científicas, coa intención de divulgar o seu labor. A coordinación correu a cargo das súas profesoras Ana Penas e Natalia Fernández.
Achegamos unhas imaxes, a modo de exemplo, mais se queredes coñecer a estas 20 científicas, só tedes que achegarvos ata o IES R. Mª Aller Ulloa para, día a día, ir descubrindo quen se esconde debaixo de cada data.
Conmemoramos o Día Internacional da Eliminación da Violencia contra a Muller, sempre coa esperanza de que sexa o derradeiro, coa exposición no vestíbulo do IES de Un ano de violencia de xénero. Unha escolma de novas sobre a violencia de xénero publicadas na prensa durante o ano, de cara a nos concienciar sobre esta terríbel lacra social. Exposición idea da profesora Alba Payo en colaboración coa Biblioteca.
Así mesmo, desde a Biblioteca facemos un chamamento a que vos unades á campaña 2023 para a prevención da violencia contra as mulleres e as nenas #Non hai escusa, promovida pola ONU.
A seguir unhas fotos da exposición que semella un bosque temático sobre a violencia de xénero:
