Encontro con Belén Montesa Lou

BELÉN MONTESA LOU, psicóloga do grupo Coidados-a-mente, estivo na Biblioteca do IES Ramón Mª Aller Ulloa, compartindo co profesorado unha charla sobre "educación sexual, e a promoción do respecto pola diversidade no entorno dixital no que se moven hoxe os mozos e as súas familias".

Como docentes, xórdennos, a diario, dúbidas e situacións que non sabemos solventar. A sexualidade é un dos temas que máis preocupa ao noso alumnado; segundo Belén Montesa, mesmo está entre os cinco primeiros. E nós, como profesorado, atopámonos cunhas etiquetas que non son máis ca iso, un nome sobre un papel. E que podemos ou debemos facer cando un adolescente require a nosa axuda? Aínda sen sermos especialistas, podemos ser a primeira persoa coa que queira falar, e para iso necesitamos unhas ferramentas mínimas.

A seguir, unhas fotos do grupo de traballo do PFPP, asistindo á ponencia de Belén Montesa, e algunhas das imaxes coas que traballou.

Obradoiro sobre sexualidade e prevención de ETS

Ao longo da semana, as profesoras Raquel Honrubia e Lara Rodríguez impartiron a alumnado de 1º da ESO e de 4º da ESO un Obradoiro sobre sexualidade e prevención de ETS. 

Ao fío do Obradoiro, Lara e Raquel reflexionan sobre a actividade: 

“As ETS, a menstruación, a anatomía dos aparatos reprodutores, así como dos órganos sexuais, os métodos anticonceptivos, a influencia da pornografía na concepción das relacións sexuais, os estereotipos xerados arredor do sexo, o concepto de “virxindade”, a importancia da comunicación e do coñecemento do propio corpo…; estes foron algúns dos temas tratados nestes obradoiros tan necesarios para a mocidade. Nestas sesións puxéronse en común preocupacións, dúbidas e curiosidades, nas que se tentou non só dar e compartir información senón tamén abrir camiño de cara á normalización da sexualidade e a desestigmatización do pracer”. 

“Foi unha experiencia do máis produtiva e enriquecedora, que obtivo unha boa acollida por parte do alumnado, sempre disposto a aprender, opinar e compartir as súas reflexións e dúbidas. Dende logo, o éxito destas xornadas debeuse a elas e eles”. 

E como non, unhas fotos da actividade: