Recepción de Gonzalo Navaza como académico de número

Gonzalo Navaza / academia.gal

 

Por fin, hoxe, 5 de novembro, ingresa como numerario da Real Academia Galega  o filólogo e escritor lalinense Gonzalo Navaza, ocupando a vacante do finado historiador Xosé Ramón Barreiro.   

O discurso de toma de posesión versará sobre Nomes de persoa na toponimia de Lalín. Acto que se poderá seguir a través da web da RAG, a partir das 12:30 horas.   

Gonzalo Navaza fora elixido académico polo pleno da RAG o 23 de outubro de 2021, mais é agora cando por fin a xustiza académica se fai realidade ao sentar de pleno dereito na cadeira de académico. 

Xa no seu momento a Marela se fixera eco da nova da elección.

Unha vez máis, moitos parabéns Gonzalo.

Gonzalo Navaza, académico

O pleno da RAG vén de elixir académico a Gonzalo Navaza, lalinense egrexio e amigo que sempre que o chamamos acode altruísta onda nós. E que mellor agasallo que este recoñecemento a Gonzalo para celebrarmos o Día das Bibliotecas.

Lembramos a súa última presenza entre nós, así como a Marela dedicada a Erros e tánatos e a exposición Unha viaxe por Lalín a través do tempo, vinculada ao relato O home do saco. 

Parabéns, académico Gonzalo, moitos parabéns.

A nosa pequena homenaxe desde a Biblioteca: 

Encontro (dobre) con... Gonzalo Navaza

Vai facer dobre xornada Gonzalo.

Ás once, estará na biblioteca para comentar a súa obra literaria...

Á unha, no Salón Teatro, xuntarémonos os dous institutos de Lalín (e quen queira) para escoitalo falar sobre O matemático Rodríguez e celebrar o Día da ciencia en galego.

Tamén recuperaremos, na entrada do instituto a exposición  O home do saco, un percorrido pola transformación urbanística de Lalín, da man do relato de Erros e Tánatos.

Erros e Tánatos na Marela

A Marela Tarabela (a orixinal, a impresa) acaba de sacar un novo número.

Trátase dunha Guía (ou conxunto de suxestións) de lectura sobre Erros e Tánatos de Gonzalo Navaza.

Se lle queredes botar unha visual podédela descargar en PDF aquí mesmo: A marela tarabela 16

Se queredes mirar algunhas das anteriores, velaquí as están.
 
 A marela tarabela 6 (Guía de lectura: Casas Baratas de Antón Riveiro Coello)

 A marela tarabela 9 (Guía de lectura: Made in Galiza de Sechu Sende)

A marela tarabela 12 (Guía de lectura: Comedia bífida de Manuel Núñez Singala)

A marela tarabela 13 (Guía de lectura: Non hai misericordia de Xelís de Toro)

A marela tarabela 14 (Guía de lectura: Galván en Saor de Darío Xohán Cabana)

A marela tarabela 15 (Guía de lectura: Memorias dun neno labrego de Xosé Neira Vilas)

'O home do saco': Unha viaxe por Lalín a través do tempo

No curso 2006-07 celebramos unha exposición sobre o crecemento urbanístico de Lalín ao abeiro da lectura do libro "Erros e tánatos" de Gonzalo Navaza, tomando como referente o relato 'O home do saco'. Así a través do periplo do seu protagonista polas rúas daquel Lalín do segundo lustro da década dos 40 e da década dos 50 reconstruímos fotograficamente os cambios urbanísticos que tiveron lugar na mesma.