Visita Radio Lalín

Esta mañá, o alumnado de 4º da ESO que forma parte do Programa Radio na Biblio tivo a oportunidade de coñecer un estudio de radio real, acompañados por María Barcala, coordinadora da radio e Uxía Nogueira, responsable da Biblioteca. Na sede de Radio Lalín, os rapaces e as rapazas do IES Aller Ulloa escoitaron as explicacións de Gumer Portas e comprobaron como se emite en directo. Resolveron dúbidas acerca da necesidade dun guión sobre o que traballar, descubriron como se pode transmitir desde un lugar diferente á propia emisora e quedaron convidados a botar man da radio local cando o necesiten.

Mais non podían saír de alí sen seren eles mesmos locutores por un día, así que, mans á obra, puxeron os cascos, abriron os seus portátiles e leron un conto que recolle, de maneira ficticia, a vida de Francisco Fernández del Riego, o autor homenaxeado o vindeiro 17 de maio.

Visita ao Parlamento de Galicia

Este luns 8 de maio, o alumnado de 3º da ESO, acompañado das profesoras Alba Payo, Sofía Ardariz e Eva Álvarez,  realizou unha saída didáctica a Santiago de Compostela, para coñecer unha das nosas institucións máis importantes, o Parlamento de Galicia.

Alí puideron coñecer a historia do edificio que o alberga, dende a súa construción como Facultade de Veterinaria ata a última reforma á que foi sometido, para acoller a sede do Poder Lexislativo Galego. Igualmente, tiveron a oportunidade de descubrir como é unha sesión, o labor dos parlamentarios e ata emular os nosos representantes con algún discurso, subindo á tribuna de oradores.

A visita tamén incluíu espazos coma a biblioteca, co seu amplo fondo documental; o Salón dos Reis, onde os presidentes da Xunta toman posesión; ou poder apreciar algunhas das obras de arte contemporánea que inclúe a Colección Parlamento.

Ao rematar esta actividade, e xa de volta cara a Lalín, aínda fixemos unha parada na Cidade da Cultura, para coller forzas antes da chegada ao Instituto.

Eva Álvarez, profesora de Historia

A seguir, unhas imaxes dos diferentes momentos no Parlamento, da man de Eva Álvarez e Alba Payo:

Premios Nacionais da Crítica

Un ano máis a Asociación española de críticos literarios  concede os seus PREMIOS NACIONAIS DA CRÍTICA LITERARIA. De entre as obras publicadas no 2022, destacan Materia, de Yolanda Castaño  e  Ninguén queda de Brais Lamela, en poesía e narrativa respectivamente.

Podedes acceder á información de Nós Diario na  ligazón.

 

Encontro con... Orgullo Galego: as imaxes

 

Encontro con Orgullo Galego

En maio do 2022 esperabamos a Borxa González, membro de Orgullo Galego, para un encontro co alumnado do segundo ciclo da ESO, arredor da temática "O galego e as redes sociais", mais a Covid-19 aínda nos quixo xogar outra mala pasada e Iago non puido reunirse co noso alumnado.

Neste 2023 convidámolo de novo, e mañá, 2 de maio, estará con nós, entre as 11:00 h e as 14:00 h, para que o noso alumnado poida aprender algo máis e resolver dúbidas e curiosidades. Con esta actividade inauguramos o "Mes das Letras" no Aller Ulloa.