Coa nosa xente : Alejandro Santórum Varela

Ao fío do seu traballo de investigación en Londres sobre o Emprego da IA para o tratamento de tumores cerebrais, dámoslle a benvida á sección Coa nosa xente ao enxeñeiro informático en intelixencia artificial e matemático Alejandro Santórum Varela.

Foto cedida a "La Voz de Galicia"

Asemade, Alejandro está a realizar un doutorado na Universidade Autónoma de Madrid, que precisamente investiga o emprego da IA na resolución de problemas médicos.

Verbo disto, en entrevista a La Voz de Galicia manifesta “O obxectivo da Intelixencia Artificial non é suplir o traballo, neste caso dun médico, pero si que lle pode servir como ferramenta para axilizar o seu traballo ou facerlle a vida máis doada e que se centre noutros temas que teña que atender. O mesmo noutros traballos e profesións”.

Moitos parabéns e moito ánimo, Alejandro

A seguir o noso Alejandro cando o Bacharelato: 

Alejandro no curso de 2º Bac. 2015-16. Copyright IES Aller Ulloa

 

 

Concurso Integra

Ao longo de toda a mañá de hoxe, estivo a celebrarse o Concurso Integra, organizado polo Departamento de Informática, e xa dentro da normalidade poscovid, o que permitiu que volveramos xuntarnos todos os ciclos no salón de actos.

A actividade consistiu en integrar nove tarefas dos distintos módulos nun proxecto final único e, á súa vez, integrar en cada un dos oito equipos a persoas dos distintos ciclos e niveis. Durante a mesma, tiveron que aplicarse na colaboración e coordinación entre as distintas especialidades, así como esforzarse ao máximo na aplicación práctica dos seus coñecementos.

O equipo gañador foi o grupo 2, formado por VERÓNICA SERVIDE e TOMÁS CEBEIRO (1º de Sistemas Microinformáticos e Redes), BARTOSZ LISIECK (2º de SMR), BORJA PEÑA (2º de Administración de Sistemas Informáticos e Redes), DAVID MÉIJOME (1º de ASIR), CHRISTIAN MACHADO (1º de Desenvolvemento de Aplicacións Web), LEIRE ESPIÑO (1º de FPB de Informática de Oficina) e VANESA LAMELA (2º de FPB de IO).

En 2º e 3º lugar quedaron os grupos 4 e 8.

Luísa Areán Taboada, profesora de FOL

A seguir, deixámosvos unhas instantáneas do que deu de si a xornada, cortesía, así mesmo, de Luísa Areán.

Ao fío de... Encontro con Emma

 

Emma Álvarez Conde, exalumna do IES Ramón María Aller Ulloa, enxeñeira informática pola UVIGO, cun Mestrado en "Deseño de Interfaces e experiencias de usuario", e que na actualidade traballa como consultora tecnolóxica na empresa ACCENTURE vén de dar unha charla ao alumnado de Tecnoloxía Industrial e Debuxo Técnico do Bacharelato e ao dos Ciclos de Informática SMR2 e DAW1.

Emma explicou a dinámica de traballo e estudo das distintas materias do Grao de Informática, as dificultades coas que se atopan os estudantes do primeiro ano que chegan desde o Bacharelato e tamén as dos que acceden desde os Ciclos de Informática, así como as saídas laborais deste grao, facendo fincapé en que nestes momentos existe unha grande demanda de traballadores con este perfil e con posibilidades laborais moi diversas.

Tamén comentou a súa experiencia ao participar no programa Erasmus e como representante do estudantado na súa etapa universitaria.

Francisco Otero, profesor de Debuxo Técnico.

A seguir, algúns comentarios dos asistentes á charla:

"Resultome moi interesante posto que na maioría das ocasións a xente non sabe que esperar da Universidade, nin do mundo laboral. Axudoume a ter unha imaxe máis clara do que podo esperar ao saír do Instituto, a pesar de que non estou interesada nesa rama da Tecnoloxía"

Sandra González, alumna do 1º curso de Bacharelato

"Serviume para coñecer novas carreiras e a saber da experiencia dunha exalumna do centro dáme máis tranquilidade"

Pablo Silva, alumno do 1º curso de Bacharelato

"No meu caso particular, querendo, ou tendo pensado en estudar enxeñería informática, pareceume realmente interesante coñecer tanto o modus operandi como as saídas laborais da carreira, para así poder tomar unha boa decisión sobre o meu futuro profesional".

Rodrigo Fernández, alumno do 2º curso de Bacharelato

Encontro con Emma Álvarez Conde

O vindeiro 19 de decembro estará de volta nas aulas do IES Aller Ulloa Emma Álvarez Conde, mais desta vez xa como muller traballadora. Da man desta ex-alumna, os rapaces e as rapazas de Tecnoloxía e Enxeñería I, Tecnoloxía Industrial II, Debuxo Técnico I e II e Desenvolvemento de Aplicacións Webs  resolverán as posibles dúbidas sobre o estudo no Grao de Enxeñería Informática. 

O luns darémosvos conta do encontro.

 

A seguir e ao abeiro da sección Coa nosa xente, recordamos a Emma de cando o seu paso polo 2º do Bacharelato.

Emma. Curso 2016-2017. Copyright IES Aller Ulloa

Coa nosa xente

Guillermo López Taboada, un informático emprendedor e multipremiado, «o catedrático máis novo da UDC»

Hai uns días La Voz de Galicia informaba sobre o feito de Guillermo se converter no catedrático máis novo da UDC.  

César Quian. La Voz de Galicia

Completando a nova, hoxe Faro de Vigo publica unha entrevista realizada a Guillermo na que entre outras cousas afirma: “Os de Lalín levamos no ADN o de que se percibes un reto podes conseguilo”, engadindo que “A informática facémola persoas co obxectivo de beneficiar a outras persoas; tamén é verdade que sempre pode haber unha ovella negra nalgún ámbito determinado”

Moitos parabéns Guillermo.

O noso Guillermo en COU. Curso 1996-1997.

Coa nosa xente...

A Intelixencia Artificial leva a un lalinense ata Cambridge.

Así titula La Voz de Galicia a nova da escolla de Alejandro Santorum Varela para cursar o Máster de Intelixencia Artificial (AI) na prestixiosa universidade británica, logo de estudar o dobre grao de Matemáticas e Enxeñaría Informática.

 

Foto: Miguel Souto. La Voz de Galicia

Alejandro, en declaracións a La Voz afirma: “Cando empecei a formularme a que me gustaría dedicarme, dei na conta de que o mundo da Intelixencia Artificial se beneficiaba moito do que eu estudaba e era un campo que estaba en desenvolvemento polo que decidín especializarme”.

Gratificante boa nova para collermos folgos ante o curso que comeza.

Moitos parabéns e moito ánimo Álex.

Alejandro no Bacharelato. Copyright IES Aller Ulloa